އެމްބާޕޭގެ ޖާދުލާއެކު ފްރާންސުން ސްޕެއިން ބަލިކޮށް ނޭޝަންސް ލީގު ކާމިޔާބުކޮށްފި

ނޭޝަންސް ލީގުގެ ފައިނަލުގައި ރޭ ފަހަތުން އަރައި ސްޕެއިން ބަލިކޮށް ފްރާންސް އިން މުބާރާތުގެ ތަށި ހޯދައިފި އެވެ.

ސްޕެއިން ބަލިކޮށް ނޭޝަންސް ލީގުގެ ތަށި ފްރާންސުން ހިއްލާލީ 2 - 1 ގެ ނަތީޖާއަކުންނެވެ. ފްރާންސް އިން ސެމީ ފައިނަލުގައި ބެލްޖިއަމްގެ މައްޗަށް ކުރިހޯދީ ވެސް ފަހަތުން އަރައިގެންނެވެ. ޔޫރޯގެ ޗެމްޕިއަން އިޓަލީން ވަނީ ރޭ ކުޅުނު ނޭޝަންސް ލީގުގެ ތިން ވަނަ ހޮވާ މެޗުން 2 - 1 ން ބެލްޖިއަމް މައްޗަށް ކުރި ހޯދާފަ އެވެ.

މެޗުގައި ފުރަތަމަ ލަނޑެއް ޖަހާ ލީޑު ނެގީ ސްޕެއިނުންނެވެ. މިލަނޑު ކާމިޔާބުކޮށްދިނީ މެޗުގެ 64 ވަނަ މިނެޓްގައި އޭރިއާތެރެއިން މިކޭލް އޮޔާޒަބާލް އެވެ.

އެހެންނަމަވެސް މެޗުގެ 66 ވަނަ މިނިޓްގައި ކަރިމް ބެންޒެމާ ވަނީ ފްރާންސަށް އެއްވަރުކޮށްދީފަ އެވެ. އޭރިއާ ރޮނގުކައިރިން ބެންޒެމާ ފޮނުވާލި ބޯޅަ ސްޕެއިންގެ ކީޕަރު އަތުގައި ޖެހިފައި ވަނީ ގޯލުގެ ތެރެއަށެވެ.

ފްރާންސް މޮޅުވި ގޯލު މެޗުގެ 80 ވަނަ މިނެޓްގައި އެޓީމަށް ޖަހައިދިނީ ކީލިއަން އެމްބާޕޭ އެެވެ.

ނޭޝަންސް ލީގުގެ ދެވަނަ ޗެމްޕިއަންކަން ފްރާންސުން ހޯދިއިރު ފުރަަތަމަ ޗެމްޕިއަނަކީ ޕޯޗުގަލް އެވެ. އެ ޓީމުން ތަށި ހޯދީ 2019 ވަނަ އަަހަރު ނެދަލެންޑްސް ބަލިކޮށްފަ އެވެ. 2018 ވަނަ އަހަރުގެ ވޯލްޑް ކަޕް ޗެމްޕިއަން ފްރާންސް އިން މި ފަހަރު ނޭޝަންސް ލީގު ކާމިޔާބުކުރީ ސްޕެއިން ބަލިކޮށްގެންނެވެ.