ފަހުވަގުތު ޖެހި ލަނޑާއެކު ލަކަޒޭޓް އާސެނަލް ސަލާމަތްކޮށްދީފި

ޕްރިމިއާ ލީގުގައި ރޭ ފަހު ވަގުތު އަލެކްސަންޑަ ލަކަޒޭޓް ޖަހައިދިން ލަނޑާއެކު ކްރިސްޓަލް ޕެލަސް އަތުން ބަލިނުވެ އާސެނަލް ސަލާމަތްވެއްޖެ އެވެ.

އެމިރޭޓްސް ސްޓޭޑިއަމްގައި ކުޅުނު މި މެޗު ނިމުނީ 2 - 2 ން އެއްވަރުވެގެންނެވެ. ރޭގެ ނަތީޖާއާ އެކު އާސެނަލް އޮތީ 11 ޕޮއިންޓާ އެކު ލީގުގެ 12 ވަނައިގަ އެވެ. ކްރިސްޓަލް ޕެލަސް އޮތީ ލީގުގެ 14 ވަނައިގަ އެވެ.

ރޭގެ މެޗުގައި ފުރަތަމަ ލަނޑުޖަހާ ލީޑުނެގީ އާސެނަލުންނެވެ. މިލަނޑު އެޓީމަށް ކާމިޔާބުކޮށްދިނީ މެޗުގެ 8 ވަނަ މިނެޓްގައި ކެޕްޓަން ޕިއޭ އެމެރިކް އޮބާމަޔަން އެވެ.

މެޗުގެ 50 ވަނަ މިނެޓްގައި ކްރިސްޓިއަން ބެންޓެކޭ ކްރިސްޓަލް ޕެލަސް އަށް އެއްވަރުކޮށްދިންއިރު މެޗުގެ 73 ވަނަ މިނެޓުގައި އޮޑްސަން އެޑޮއާޑް ވަނީ އެޓީމަށް ލީޑު ނަގައިދީފަ އެވެ. އާސެނަލުން އެއްވަރުކުރި ގޯލު ޖެހީ އިތުރު ވަގުތުގެ 5 ވަނަ މިނެޓުގައި ލަކަޒޭޓް އެވެ. މިއީ މި ފަހަރު ލީގުގައި ލަކަޒޭޓްގެ ފުރަތަމަ ގޯލެވެ.