ސާފު ބޯފެން ލިބުމުގެ ހައްގު ނިގުޅައިގަނެފައިވާ މުޖުތަމައުތަކަށް އެހީވުމަށް ގޮވާލައިފި

ސާފު ބޯފެނާއި ސާފުތާހިރުކަން ލިބުމުގެ ހައްގު ނިގުޅައިގަނެފައިވާ މުޖުތަމައުތަކަށް ވަސީލަތްތަކާއި ގާބިލްކަން އިތުރު ކުރުމަށް ކުރެވޭ މަސައްކަތްތަކުގއި ބައިނަލްއަގްވާމީ މުޖުތަމައުން އެއްބާރުލުން ދިނުމަށް އދ. ގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ގޮވާލައްވައިފި އެވެ.

ހަތަރުވަނަ ގްލޯބަލް ވޯޓާ އޮޕަރޭޓާސް ޕާޓްނާޝިޕްސް ކޮންގްރެސްގައި ވާހަކަފުޅު ދައްކަވަމުން ޝާހިދު ވިދާޅުވީ ދިރިހުރުމަށް ފެން ބޭނުންވާއިރު އެކަށީގެންވާ ސާފު ބޯފެނާއި ސާފުތާހިރުކަން ލިބުމަކީ އިންސާނީ އަސާސީ ހައްގެއް ކަމަށް ގަބޫލުކުރަންޖެހޭ ކަމަށެވެ.

ޔުނިސެފުން ބުނާ ގޮތުގައި ދުނިޔޭގެ އެކި ކަންކޮޅުތަކުގައި 1.42 ބިލިއަނަށް ވުރެ ގިނަ މީހުން، އެއީ 450 މިލިއަން ކުޑަކުދިން ހިމެނޭގޮތަށް، ދިރިއުޅެމުންދަނީ އެކަށީގެންވާ ގޮތެއްގައި ފެން ނުލިބިކަމަށާއި އެއީ ދުނިޔޭގެ އެކި ކަންކޮޅުތަކުގައި ކޮންމެ 5 ކުއްޖަކުން 1 ކުއްޖަކަށް އެކުދިންގެ އަސާސީ ބޭނުންތައް ފުއްދުމަށް ބޭނުންވާ މިންވަރަށް ފެން ނުލިބޭކަން ފާހަގަ ކުރެއްވި އެވެ.

މީގެ އިތުރުން އެމަނިކުފާނު ވިދާޅުވީ މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ފެނާ ގުޅުން ހުރި ނުރައްކާތަކުގެ ސަބަބުން އެތައް މިލިއަން ބަޔަކު ގެދޮރުދޫކޮށް އެހެން ހިސާބުތަކަށް ހިގުރަކުރަން ޖެހިފައިވާކަމަށެވެ.

"މާނަ އަކީ ދުނިޔޭގެ އެކި ސަރަހައްދުތަކުގައި ކޮންމެ ފަސް ކުއްޖަކުން އެއް ކުއްޖަކަށް އެކުދިންގެ އަސާސީ ބޭނުންތައް ފުއްދުމަށް ބޭނުންވާ މިންވަރަށް ފެން ނުލިބޭ ކަން. މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ފެނާ ގުޅުން ހުރި ނުރައްކާތަކުގެ ސަބަބުން އެތައް މިލިއަން ބަޔަކު ގެދޮރު ދޫކޮށް އެހެން ހިސާބުތަކަށް ހިޖުރަކުރަން ޖެހޭކަން މިއީ ގަބޫލުކުރަންޖެހޭ ހަގީގަތެއް،" ޝާހިދު ވިދާޅުވި އެވެ.

އެމަނިކުފާނު ވިދާޅުވީ ފެނުގެ ދަތިކަން ހުރި ގޭބިސީތަކުގެ 80 އިންސައްތަ ގޭބިސީގައި ފެން ނެގުމުގެ ޒިންމާ އުފުލަނީ އަންހެނުންނާއި އަންހެން ކުދިން ކަމަށާއި ކޮންމެ ދުވަހަކު 200 ގަޑިއިރު އެމީހުން އެ މަސައްކަތުގައި ހޭދަކުރާ ކަމަށެވެ. އެކަމުގެ ތެރޭގައި ގިނަ ފަހަރަށް ދިގު ދަތުރުތައް ކުރުމާއި، ބަރުކޮށް އެއްޗެހި އުފުލުމާއި އަދި އަނިޔާގެ ނުރައްކާ އަންހެނުންނަށް ކުރިމަތިވާ ކަމަށެވެ. އެކަމުގެ ސަބަބުން އަންހެން ކުދިން ތައުލީމުން މަހުރޫމުވެ، އާމްދަނީ ހޯދުމުގެ ފުރުސަތުތައް ހަނިވަމުންދާ ކަމަށް ފާހަގަކުރެއްވި އެވެ.

"އެއްވެސް ހަމައެއްގައި މިކަމަކީ ރަނގަޅު ކަމެއް ނޫން. މިކަންކަމުން އަރައިގަންނަން މަސައްކަތްތަކެއް މިވަނީ ކުރަންޖެހިފައި،" ޝާހިދު ވިދާޅުވި އެވެ.