ހަނި ތަފާތަކުން ޓޮރީނޯ ބަލިކޮށް އޭސީ މިލާން އެއްވަނައަށް

އިޓާލިއަން ލީގުގައި ރޭ އޭސީ މިލާނާއި ޓޮރީނޯ ބައްދަލުކުރި މެޗުގައި އޮލިވިއާ ޖިރޫޑް ޖެހި ހަމައެކަނި ލަނޑާއެކު 1 - 0 ން ޓޮރީނޯ ބަލިކޮށް ލީގުގެ އެއްވަނައަށް އޭސީ މިލާން ޖެހިލައިފި އެވެ.

މިލާން އެއްވަނައިގައި އޮތީ 10 މެޗުން ހޯދި 28 ޕޮއިންޓާއެކުގަ އެވެ. އަދި ދެވަނައިގައި އޮތް ނަޕޯލީއަށް ލިބުނީ ނުވަ މެޗުން 25 ޕޮއިންޓެވެ.

އަމިއްލަ ދަނޑުގައި މިލާނުން ރޭގެ މެޗުގައި ޖެހި ހަމައެކަނި ގޯލު ޖެހީ މެޗުގެ 14 ވަނަ މިނިޓްގައި ކޯނަރަކުން އޭރިއާތެރެއަށް ހުރަސްވި ބޯޅައަކުން އޮލިވިއާ ޖިރޫޑެވެ. ޖިރޫޑް ވަނީ ރަނގަޅު ތަނަށް ހުސްވެ ބޯޅަ ގޯލުގެ ތެރެއަށް ފޮނުވާލައިފަ އެވެ.

މިއީ މި ސީޒަނުގައި ޗެލްސީ ދޫކޮށް މިލާނަށް ބަދަލުވި ޖިރޫޑް އެ ޓީމަށް ޖަހައިދިން ހަތަރު ވަނަ ލަނޑެވެ.