މަސްދަޅު އަގު ބޮޑުކުރަން ނިންމި ނިންމުމަށް އަމަލު ކުރުން މަޑުޖައްސާލައިފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ވިއްކާ މަސްދަޅުގެ އަގު ބޮޑުކުރަން ނިންމި ނިންމުމަށް އަމަލު ކުރުން މަޑުޖައްސާލައިފި އެވެ.

އެ ކުންފުނިން ބުނީ މަސްދަޅުގެ އަގު ބޮޑުވާނެ ކަމަށް އެ ކުންފުނިން ކުރި އިއުލާނަށް އަމަލު ކުރުން ފަސްކުރަން ނިންމީ ރޯދަމަސް ކުރިއަށް އޮތުމުން ކަމަށެވެ.

މާޗު މަހު ފުރަތަމަ ހަފްތާ އިން ފެށިގެން މަސްވެރިންގެ އަތުން މަސް ގަންނާނީ ދުނިޔޭގެ ބާޒާރުގައި މަހުގެ އަގަށް ބަލާފައި ކަމަށް ރައީސް އިބްރާހިމް މުހައްމަދު ސޯލިހު ވަނީ މި އަހަރުގެ ރިޔާސީ ބަޔާނުގައި އިއުލާން ކުރައްވައިފަ އެވެ. ސަރުކާރުގެ އެ ނިންމުމާއެކު މިފްކޯއިން ވަނީ މަސްވެރިންގެ އަތުން މަސް ގަންނަ އަގު މާދަމާއިން ފެށިގެން ބޮޑު ކުރުމަށް ނިންމާފައެވެ.

މިފްކޯއިން އަންދާޒާ ކުރާ ގޮތުން މަސް ގަންނަ އަގަށް އަންނަ ބަދަލާއެކު ކޭހަކުން 60 ރުފިޔާ އަގު ބޮޑުވާނެ އެވެ. މިފްކޯއިން ބުނީ މަސްދަޅު އަގު ބޮޑުކުރުން ފަސްކުރި ނަމަވެސް މަސްވެރިން ބާނާ މަހަށް ބޮޑު އަގު ދެމުންދާނެ ކަމަށެވެ.

ބާޒާރުގައި 48 ދަޅުގެ ތެޔޮ މަސްދަޅު ކޭހެއް މިހާރު ލިބެނީ 610ރ. އަށެވެ. އަދި 24 ދަޅުގެ ކުޑަ ކޭހެއް ލިބެނީ 305ރ. އަށެވެ.