ހިލޭ ބަހާ މަސްދަޅުން 40ގ މަސް އުނިކުރާ ވާހަކަ އަކީ ދޮގެއް: މިފްކޯ

ރޯދަމަހަށް ހިލޭ ބަހަން ތައްޔާރުކުރާ މަސް ދަޅުތަކުން 40 ގްރާމް އުނިކޮށްފައިވާކަމަށް ދެކެވޭ ވާހަކަ މިފްކޯއިން ދޮގުކޮށްފިއެވެ.

މިކަން ހާމަކޮށް މިފްކޯއިން ބުނެފައިވަނީ ރޯދަޔަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުނި ނުވާނެ ކަމަށާއި ފަތުރަމުންދަނީ ދޮގު ވާހަކަތަކެއް ކަމަށެވެ.

ރައީސްގެ ވައުދުފުޅާ އެއްގޮތަށް ރޯދަޔަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުންޏެއް ނުވާނެ. ފަތުރަމުން ދަނީ ދޮގު ވާހަކަތަކެއް. 140g ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި. މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ

— MIFCO (@mifcomv) January 19, 2025

މިފްކޯއިން މި ރޯދަމަހާ ދިމާކޮށް 140 ގްރާމްގެ މަސްދަޅު ބާޒާރަށް ނެރެފައިވެއެވެ. 140 ގްރާމްގެ މަސް ދަޅެއް ވިއްކަން ނިންމާފައިވަނީ 15 ރުފިޔާއަށެވެ. އަދި ކޭހެއް 700 ރުފިޔާއަށެވެ.

މިފްކޯއިން ބުނެފައިވަނީ 140 ގްރާމް މަސްދަޅު ބާޒާރަށް ނެރުނީ ކުދި ގޭބިސީތަކަށް އަދި އެއްފަހަރު ބޭނުންކުރެވޭ އެއްޗެއްގެ ގޮތުގައި ކަމަށާއި މަސްދަޅު ފްރިޖް ކުރުމަކީ ރަނގަޅު ކަމަކަށް ނުވާތީ ކަމަށެވެ.

މި ރޯދަމަހަށް ކޮންމެ ގޭބިސީއަކަށް މަސް ކޭހެއްގެ މަގުން ބެހުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ.