އިޓަލީގެ ވޯލްޑްކަޕްގެ އުއްމީދުތައް ފެނަށް، ޕޯޗުގަލް ޕްލޭއޮފް ފައިނަލުގައި ނޯތް މެކެޑޯނިއާ ދެކޮޅަށް

ފީފާ ވޯލްޑް ކަޕްގެ ކޮލިފައިން ޕްލޭއޮފްގައި ރޭ ނޯތު މެސެޑޯނިއާ އަތުން ބަލިވެ، އެންމެ ފަހުގެ ޔޫރޯ ޗެމްޕިއަން އިޓަލީގެ ވޯލްޑްކަޕްގެ އުއްމީދުތައް ފެނަށް ވެގެންދިޔައިރު ތުރުކީ ބަލިކޮށް ޕޯޗުގަލް ޕްލޭއޮފް ފައިނަލުން ފުރުސަތު ހޯދައިފި އެވެ.

4 ފަހަރު ދުނިޔޭގެ ޗެމްޕިއަން އިޓަލީ ރޭ ހަނި ތަފާތަކުން ނޯތް މެސެޑޯނިއާ އަތުން ބަލިވެ ވޯލްޑްކަޕަށް ކޮލިފައިނުވެ ކެޓިއިރު މިއީ ޖައްސަ ޖައްސައިގެން އެގައުމަށް ދެ މުބާރާތުން ފުރުސަތު ގެއްލުނު ފުރަތަމަ ފަހަރުކަން ފާހަގަކޮށްލެވެ އެވެ.

1 - 0 ން ނޯތް މެސެޑޯނިއާއިން ރޭ އިޓަލީ ބަލިކުރިއިރު އެޓީމުގެ ހަމައެކަނި ގޯލު މެޗުގެ އިތުރުވަގުތުގެ ތެރޭގައި ކާމިޔާބުކޮށްދިނީ އެޓީމުގެ އަލެކްސަންޑަ ޓްރަޖޯވްސްކީ އެވެ.

ރޭ ކުޅެވުނު އަނެއް މެޗުގައި ފުޓްބޯޅައިގެ ތަރި ކުރިސްޓިއާނޯ ރޮނާލްޑޯގެ ޕޯޗުގަލުން ވަނީ ތުރުކީ ބަލިކޮށް ވޯލްޑްކަޕްގެ އުއްމީދު އާކޮށްފަ އެވެ. ރޭގެ މެޗުގައި ތުރުކީގެ މައްޗަށް ޕޯޗުގަލުން ކުރިހޯދީ 3 - 1 ނަތީޖާއަކުންނެވެ.

މެޗުގައި ފުރަތަމަ ލަނޑެއްޖަހާ ލީޑު ނެގީވެސް ޕޯޗުގަލުންނެވެ. މިލަނޑު ކާމިޔާބުކުރީ އޮޓާވިއޯ އެވެ. އަދި ފުރަތަމަ ހާފު ނިމުމުގެ ކުރިން ޕޯޗުގަލްގެ ޑިއޯގޯ ޖޮޓާ ވަނީ ޕޯޗުގަލްގެ ލީޑު ފުޅާކޮށްފަ އެވެ. ތުރުކީގެ ހަމައެކަނި ލަނޑު އެޓީމުގެ ބުރަކް ޔިލްމާޒް ކާމިޔާބުކޮށްދިންއިރު ޕޯޗުގަލްގެ 3 ވަނަ ލަނޑު މެޗުގެ އިތުރުވަގުތުގައި ކާމިޔާބުކުރީ މަތިއު ނޫނިއޭޒް އެވެ.

މިމެޗުން ހޯދި މޮޅާއެކު ޕްލޭއޮފް ފައިނަލަށް ޕޯޗުގަލް ދަތުރުކުރިއިރު އަންނަ އަންގާރަދުވަހު ޕްލޭއޮފް ފައިނަލުގައި ޕޯޗުގަލް ނުކުންނަން ޖެހޭނީ އިޓަލީ ކަޓުވާލާ ފައިނަލަށް ދަތުރުކުރި ނޯތް މެސެޑޯނިއާ ދެކޮޅަށެވެ.

ޔޫރަޕްގެ ކޮލިފައިން ޕްލޭއޮފްގައި ރޭ ދެން ކުޅެވުނު މެޗުތަކުގެ ތެރެއިން ގެރެތް ބޭލްގެ ވޭލްސްއިން ވަނީ 2 - 1 އިން އޮސްޓްރިއާ ބަލިކޮށްފަ އެވެ. ވޭލްސްއަށް ވޯލްޑްކަޕުން ޖާގައެއް ލިބޭނީ ޖޫން މަހު ސްކޮޓްލެންޑާއި ޔޫކްރެއިން ކުޅެގެން މޮޅުވާ ޓީމެއް ބަލިކޮށްގެންނެވެ.

ސްވިޑެން ރޭ 1 - 0 ން ޗެކް ރިޕަބްލިކް ބަލިކޮށް ޕްލޭއޮފް ފަައިނަލަށް ދަތުރުކުރިއިރު އަންނަ އަންގާރަ ދުވަހުގެ ރޭ ފައިނަލުގައި އެޓީމު ނުކުންނާނީ ޕޮލެންޑާ ދެކޮޅަށެވެ. ޕޮލެންޑަށް ފައިނަލުން ޖާގަ ލިބުނީ ރަޝިއާ ސަސްޕެންޑްކުރުމުންނެވެ.