މިފްކޯއިން މަސް ކިރާވަރު ކޮންޓްރޯލްކޮށްފި

ފްރީޒިން ކެޕޭސިޓީއަށްވުރެ ގިނައިން މަސް ލިބޭތީ، ދޯނިތަކުން މަސް ކިރާވަރު މިފްކޯއިން ކޮންޓްރޯލް ކޮށްފި އެވެ.

މި ދުވަސްވަރު ދެކުނުގެ މަސްވެރިކަން އާދަޔާ ޚިލާފަށް ރަނގަޅުވެފައި ވާކަން ފާހަގަކޮށް މިފްކޯއިން ބުނީ، ދެކުނުގެ ސެންޓަރުތަކާއި ބޯޓުފަހަރަށް ގިނަ އަދަދެއްގެ ދޯނިތައް މަސް ކިރުވަން ދާކަމަށެވެ.

އެހެންކަމުން މިފްކޯގެ ފްރީޒިން ކެޕޭސިޓީއަށްވުރެ ގިނައިން މަސް ލިބެމުންދާ ކަމަށް އެ ކުންފުނިން ބުންޏެވެ. އިއްޔެއިން ފަށައިގެން މިފްކޯއިން މަސް ކިރަމުން ދަނީ ދޯންޏަކުން ދުވާލަކަށް ފަސް ޓަނު މަހެވެ.

މިދިޔަ ހޯމަ ދުވަހު 770 ޓަނު މަސް އަދި އަންގާރަ ދުވަހު 620 ޓަނު މަސް ކިރުވުމަށް މިފްކޯގެ ސެންޓަރުތަކަށް ގޮސްފައިވާކަމަށް މިފްކޯއިން ބުންޏެވެ. މިފްކޯގެ ދެކުނުގެ ފްރީޒިން ކެޕޭސިޓީއަކީ ދުވާލަކަށް 420 ޓަނު މަހެވެ.

މިފްކޯއިން ބުނީ، މަސް ކިރާވަރު ކޮންޓްރޯލް ކުރި ނަމަވެސް، ކޫއްޑޫ ފިޝަރީޒް ކޮމްޕްލެކްސް އާއި އައްޑޫ ފިޝަރީޒް ކޮމްޕްލެކްސްގައި މިހާރު ކިއު ނަންބަރު ދީފައިވާ ދޯނިފަހަރުގެ މަސް ކިރައި ނިމެންދެން، ކޮންޓްރޯލެއް ނެތި މަސް ކިރާނެ ކަމަށެވެ.