އަންނަ ސީޒަނުގައި ވެސް އެމްބާޕޭ ފެންނާނީ ޕީއެސްޖީން: ޕޮޗެޓީނޯ

އަންނަ ސީޒަނުގައި ވެސް ޕީއެސްޖީއަށް ކުޅެމުން އަންނަ ޒުވާން ތަރި ކީލިއަން އެމްބާޕޭ ފެންނާނީ ހަމަ އެޓީމުން ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

ޕޮޗެޓީނޯ މިހެން ބުނެފައި މިވަނީ އެމްބާޕޭ ސްޕެއިންގެ ޗެމްޕިއަން ރެއާލް މެޑްރިޑަށް ދާން އުޅޭކަމުގެ އަޑުތައް ގަދަވެފައި އޮތް ދަނޑިވަޅެއްގަ އެވެ. ގިނަ ނޫސްތަކަކުން އެމްބާޕޭ ރެއާލަށް ބަދަލުވާން އުޅޭ ވާހަކަތަކެއް ރިޕޯޓުކޮށްފައިވީ ނަމަވެސް ޕޮޗެޓީނޯ ބުނީ އޭނާ ޕީއެސްޖީގައި މަޑުކުރާނެ ކަމަށެވެ.

މިވަގުތު އެމްބާޕޭ ޕީއެސްޖީގައި ހުރީ އަންނަ ޖޫންމަހުގެ ނިޔަލަށް ހަދާފައިވާ އެއްބަސްވުމެއްގަ އެވެ. މި ސީޒަނުގެ ޗެމްޕިއަންސް ލީގުގެ ގަދަ 16 އިން ޕީއެސްޖީ ކެޓުމުން ޕޮޗެޓީނޯއަށް ކޯޗުގެ މަގާމު ގެއްލޭނެ ކަމަށް ގިނަ މީޑިއާތަކަކުން ރިޕޯޓުކުރި އެވެ. އެހެންނަމަވެސް ޕީއެސްޖީގެ ސްޕޯޓިން ޑިރެކްޓަރު ލިއޯނާޑޯ ވަނީ ޕީއެސްޖީގައި ޕޮޗެޓީނޯ މަޑުކުރާނެކަމުގެ އިޝާރާތެއް ދީފަ އެވެ.

ދާދި ފަހުނ ޕީއެސްޖީން ވަނީ ފްރެންޗް ލީގުގެ ޗެމްޕިއަންކަން ހޯދާފަ އެވެ. ޕޮޗެޓީނޯ ވަނީ އަންނަ ސީޒަނުގައި އޭނާ އާއި އެމްބާޕޭ ވެސް ފެންނާނީ ޕީއެސްޖީން ކަމަށް ބުނެފަ އެވެ.

އެއީ އޭނާގެ ހިތް އެދޭ ގޮތް ކަމަށާއި މިދަނޑިވަޅުގައި ވިސްނަނީ ވެސް ހަމައެކަނި އެ ގޮތަށް ކަމަށް ޕޮޗެޓީނޯ ބުންޏެވެ. އަދި އޭނާއާއި އެމްބާޕޭގެ މުސްތަގުބަލާ ބެހޭގޮތުން ވެސް 100 ޕަސެންޓް ޔަގީންކަން އެބައޮތްކަމަށް ޕޮޗެޓީނޯ ބުންޏެވެ.

ގިނަ މީޑިއާތަކަކުން އެމްބާޕޭ ރެއާލަށް ބަދަލުވާން އެއްބަސްވެފައިވާ ކަމަށް ރިޕޯޓުކޮށްފައިވީ ނަމަވެސް އެމްބާޕޭ ވަނީ މުސްތަގުބަލާ ބެހޭގޮތުން ގޮތެއް ނިންމާ އަންނަ ސީޒަނުގައި ކުޅޭނެ ވަކި ކްލަބެއް އަދި ނުނިންމާކަމަށް ފްރާންސްގެ ނޫހަކަށް ދިން އިންޓަވިއުއެއްގައި ބުނެފަ އެވެ.