މިސްރާ ދެކޮޅަށް ކުޅުނު މެޗުގައި ފެނުނު ހަރަކާތްތަކުގެ ސަބަބުން ސެނެގާލަށް ބޮޑު ޖޫރިމަނާއެއް

ފީފާ ވޯލްޑް ކަޕް ކޮލިފައިންގެ އެފްރިކާ ބައްރުގެ ޕްލޭއޮފްގައި މިސްރުން ސެނެގާލާ ދެކޮޅަށް ސެނެގާލުގައި ކުޅުނު މެޗުގައި ސަޕޯޓަރުންގެ ފަރާތުން ފެނުނު ހަރަކާތްތަކުގެ މައްސަލަ ބެލުމަށް ފަހު ފީފާއިން ފިޔަވަޅު އަޅައިފި އެވެ.

ސެނެގާލްގެ ޑިއަމްނިއާޑިއޯ އޮލިމްޕިކް ސްޓޭޑިއަމްގައި ކުޅުނު މެޗުގައި ސެނެގާލުގެ ސަޕޯޓަރުން މިސްރުގެ ކުޅުންތެރިންގެ މޫނަށް ލޭޒާ ލައިޓް އަޅުވާ ދަނޑަށް ފުޅި ފަދަ ތަކެތި ވަނީ އުކާފަ އެވެ.

މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފުގައި ވެސްް އިތުރު ގޯލެއް ނުޖެހި ޕެނަލްޓީއަށް ދިޔަ މިމެޗުގައި މިސްރުގެ ކުޅުންތެރިން މޫނަށް ލޭޒާ އެޅުވުމުގެ ސަބަބުން އެކަމުގެ އަސަރު ވަނީ ކުޅުންތެރިންނަށް ކޮށްފަ އެވެ. ޕެނަލްޓީން މިސްރު ބަލިވުމާއެކު މިސްރުގެ ފުޓްބޯޅަ ފެޑެރޭޝަނުން ވަނީ ސެނެގާލާ ދެކޮޅަށް މައްސަލަ ހުށަހަޅައިފި އެވެ.

ފީފާއިން މައްސަލަ ބެލުމަށްފަހު ސެނެގާލް 180،000 ޑޮލަރުން ޖޫރިމަނާކޮށް، ސަޕޯޓަރުން ނުވައްދައި އެއް މެޗު ކުޅެން ޖެހޭ ގޮތަށް ސަސްޕެންޝަނެއް ވަނީ ދީފަ އެވެ.