ދިވެހި ރުފިޔާގެ ރަސްމީ ނިޝާން އިފްތިތާހުކޮށްފި

ދިވެހި ރުފިޔާގެ ނިޝާން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައާރަފު ކޮށްފި އެވެ. މިއީ ދިވެހި ރުފިޔާގެ ނިޝާން ތައާރަފު ކުރި ފުރަތަމަ ފަހަރެވެ.

އިއްޔެ އެމްއެމްއޭގައި ބޭއްވި ރަސްމިއްޔާތެއްގައި އެ ނިޝާން އިފްތިތާހުކޮށްދެއްވީ ޓެކްނޮލޮޖީ މިނިސްޓަރު އާމިނަތު ޝައުނާއެވެ.

އެމްއެމްއޭއިން އެ ނިޝާން ފަރުމާކުރުމަށް މިދިޔަ އަހަރުގެ ޖަނަވަރީ މަހު ވަނީ 20،000 ރުފިޔާގެ މުބާރާތެއް އިއުލާނުކޮށްފައެވެ. 70 އަށް ވުރެ ގިނަ ޕްރޮޕޯސަލް އެ މުބާރާތަށް ލިބުނު އިރު އެންމެ މޮޅު ނިޝާނެއް ހޮވީ ހާއްސަ ޖަޖުންގެ ޕެނަލަކުންނެވެ.

ރުފިޔާގެ ރަސްމީ ނިޝާނެއްގެ ގޮތުގައި ބޭނުން ކުރުމަށް ހަމަޖެހިފައިވަނީ ތާނައިގެ ރާ އަކުރުގެ މެދުން އިތުރު ރޮނގެއް ދެމުމުން އިންނަ ގޮތަށް ފަރުމާކޮށްފައިވާ ނިޝާނެކެވެ.

އެމްއެމްއޭއިން ބުނީ ދެން ނެރޭ ރުފިޔާގެ ނޫޓުތަކުގައި އެ ނިޝާން ބޭނުން ކުރާނެ ކަމަށެވެ. ލިޔުމުގައި އެ ނިޝާން ބޭނުންކުރުމަށް ހަމަޖެހިފައިވަނީ ހިސާބު އަކުރުގެ ފަހަތަށެވެ.

މި ނިޝާން ފަރުމާކޮށްފައި ވަނީ ރާއްޖޭގެ މަޝްހޫރު ކުރެހުންތެރިއެއް ކަމަށްވާ މ. ސްޕޮޓްލައިޓް، ހަސަން ޝުޖާއު އެވެ.

ރުފިޔާގެ ނިޝާނަކީ ލިޔުމުގައި ފައިސާގެ ނަން ލިޔުމުގެ ބަދަލުގައި ބޭނުން ކުރާ ނިޝާނެކެވެ.