އީދު ބަންދުގެ ކުރިއަށް މުއާމަލާތްތައް ނިންމަން ބޭންކުން އެދިއްޖެ

އަޟްޙާ އީދު ބަންދާ ގުޅިގެން 10 ން 14 ޖުލައިގެ ނިޔަލަށް ބޭންކު ބަންދު ކުރުމަށް ނިންމާފައިވުމާއެކު މި ހަފްތާގައި މުހިންމު ބޭންކިން ހިދުމަތްތައް ހޯދުމަށް ބޭންކް އޮފް މޯލްޑިވްސް (ބީއެމްއެލް)އިން އެދިއްޖެއެވެ.

ބަންދުގެ ދުވަސްތަކަށް ފަހު ބީއެމްއެލް ދެން ހުޅުވުމަށް ނިންމާފައިވަނީ މި މަހުގެ 17 ވަނަ ދުވަހު އެވެ.

ބީއެމްއެލް އީދު ޗުއްޓީއަށް ބަންދުކުރާތީ އެ ބޭންކުން ވަނީ އޭގެ ކުރިއަށް ބައެއް ހިދުމަތްތައް ނިންމަން ސުންގަޑި ވެސް ކަނޑައަޅާފަ އެވެ. އެ ވަގުތުގެ ތެރޭގައި އެ ހިދުމަތެއް ނިންމަންވެސް ބީއެމްއެލް އިން އެދިފައިވެ އެވެ.

ބީއެމްއެލް އިން ބުނީ ބޭންކް ބަންދުކުރިޔަސް އިންޓަނެޓް ބޭންކިން އާއި މޮބައިލް ބޭންކިންގެ ހިދުމަތް ބޭނުންކުރެއްވޭނެ ކަމަށެވެ. ނަގުދު ފައިސާގެ މުއާމަލާތްތަކަށް އޭޓީއެމް މެދުވެރިކޮށް ފައިސާ ޖަމާކުރުމާއި ފައިސާ ނެގުމާއި ފައިސާ ފޮނުވުމުގެ ހިދުމަތް 24 ގަޑިއިރު ލިބޭނެ އެވެ.