ކުނިކޮށި ފާރު ރާނާ ނިންމާލައިފި

ކުޅުދުއްފުށީ ކުނިކޮށީގެ ވަށާފާރު ރާނާ ނިންމާލައިފި އެވެ. ކުނިކޮށީގެ ވަށާފާރު ރޭނުމަށް ސިޓީ ކައުންސިލުން ހަވާލުކޮށްފައިވަނީ ޕްލަސް ބީ ނަމަކަށް ކިޔާ ކުންފުންޏަކާ އެވެ.

ސިޓީ ކައުންސިލުން ބުނީ، ކުނިކޮށީގެ ވަށާފާރު ރޭނުމުގެ މަސައްކަތް ނިންމިފައިވާ ކަމަށާ، މި މަޝްރޫއުގެ ދަށުން ކުނިކޮށީގެ ވަށާފާރު، ސެކިއުރިޓީ ހަޓް އަދި ފަހާނާ ރާނާ، ސިމެންތި ޖަހައި، ކުލަލުމާއެކު 2 ގޭޓް ހަރުކޮށްފައިވާ ކަމަށެވެ. އަދި ސެކިއުރިޓީ ކެމެރާ އާއި ލައިޓް ޕޯލްތައް ޖަހައި ލައިޓް ހަރުކޮށް ކަރަންޓް ވަޔަރިންގެ މަސައްކަތް ކޮށްފައިވާ ކަމަށެވެ.

ކުނިކޮށި ވަށާ ރޭނި މި ފާރުގެ ދިގުމިނުގައި 610 މީޓަރު ހުންނައިރު ފުޅާ މިނުގައި 5 އިންޗި ހުރެ އެވެ. އަދި ފާރުގެ އުސްމިނުގައި 8 ފޫޓް ހުންނައިރު ބައެއް ހިސާބުތަކުގައި ފާރުގެ އުސްމިނުގައި 6 ފޫޓް ހުރެ އެވެ.

މިދިޔަ ސެޕްޓެމްބަރުމަހު ހަވާލުކުރެވުނު މި މަޝްރޫއުގެ ޖުމްލަ އަގަކީ 2،999،438 (ދެ މިލިޔަން ނުވަ ލައްކަ ނުވަދިހަ ނުވަ ހާސް ހަތަރު ސަތޭކަ ތިރީސް އަށް ރުފިޔާ) އެވެ.