ހެޒިޑާކިސްއާއި ރޮބާޓްސަން، އުޅަބޯށިން ޖެހި މައްސަލަ ނިމެންދެން ރެފްރީކަމާއި ދުރަށް
ލިވަޕޫލުގެ ޑިފެންޑަރު އެންޑީ ރޮބާޓްސަންގެ މޫނުގައި އުޅަބޯށިން ޖެހިކަމަށް ބުނާ ތަހުގީގު ނިމެންދެން އެސިސްޓެންޓް ރެފްރީ ކޮންސްޓެންޓިން ހެޒިޑާކިސް އެއްވެސް މެޗެއްގައި ޝާމިލުނުވާނެކަމަށް ރެފްރީން ބޮޑީ ޕީޖީއެމްއޯއެލްއިން ބުނެފި އެވެ.
އާދިއްތަދުވަހު ޕްރިމިއާ ލީގުގައި އާސެނަލާއި ލިވަޕޫލް 2 - 2 ން އެއްވަރުވި މެޗުގައި ފުރަތަމަ ހާފުގެ ފަހުވަގުތު ރޮބާޓްސަންއާއި ރެފްރީގެ ކްލޭޝްއެއް ފެނިގެންދިޔަ އެވެ. ރެފްރީގެ އުޅަބޯށި ރޮބާޓްސަންގެ ދަތްދޮޅީގައި ޖެހި ހިނގި ހަމަ ނުޖެހުމެކެވެ.
އެއް މައްސަލައިގައި މެޗުގެ ރެފްރީއާއި ދިމާލަށް ރުޅި އައިސްހުރެ ރޮބާޓްސަންއާއި ލިވަޕޫލުގެ ކުޅުންތެރިން ދިޔައިރު އެމެޗުގައި ރޮބާޓްސަންއަށް ރީނދޫ ކާޑެއް ވެސް ދެއްކި އެވެ.
ރެފްރީން ބޮޑީ ޕީޖީއެމްއޯއެލްއިން ބުނީ އެފްއޭއިން ތަހުގީގު ކުރިއަށް ގެންދަނިކޮށް އެއްވެސް މުބާރާތެއްގެ އެއްވެސް މެޗެއްގައި ހެޒިޑާކިސް ރެފްރީކަން ނުކުރާނެކަމަށެވެ. މަޝްހޫރު ނޫސް ބީބީސީއަށް ދިން އިންޓަވިއުއެއްގައި ކުރީގެ ބްލެކްބާންގެ ސްޓްރައިކަރު ކްރިސް ސަޓަން ބުނީ އޭނާ ބޭން ކުރަން ޖެހޭ ކަމަށާއި ގިނަ މެޗުތަކަކަށް އެރުމުގެ ފުރުސަތު ލިބިގެން ނުވާނެކަމަށެވެ.
"އެހެން އުޅަބޯށި އުކަމުން އެސިސްޓެންޓުންނަކަށް ނޫޅެވޭނެ. އަހަރެންނަކަށް އެއްގޮތަކަށް ވެސް ނޭނގޭ އޭނާ ހިތުގައި އެއޮތް އެއްޗެއް، އަދި މިކަހަލަ އެހެން ހާދިސާއެއް ވެސް ހަނދާނަކަށް ނާދޭ." ކްރިސް ސަޓަން ބުންޏެވެ.
ކުރީގެ މެންޗެސްޓަރ މިޑްފީލްޑަރު ރޯއީ ކީން 28 އަހަރުގެ ރޮބާޓްސަން ސިފަކުރީ ކުޑަކުއްޖެއްގެ ގޮތުގަ އެވެ. ސްކައި ސްޕޯޓްސްއާ ވާހަކަ ދައްކަމުން ކީން ބުނީ ލައިންސްމަނުގެ ގައިގައި ފުރަތަމަ ހިފީ ރޮބާޓްސަން ކަމަށާއި ރޮބާޓްސަން ބޮޑަށް އިސްކަން ދޭންވީ ޑިފެންޑް ކުރުމަށް ކަމަށެވެ. އަދި މެޗާއެކު ކުރިއަށް ދިއުމަށް ކަމަށެވެ.
