ހިލޭ ޓްރާންސްފާއެއްގެ ދަށުން މާކަސް ތުރާމް އިންޓައަށް

ބުންޑަސްލީގާގެ ބޮރޫޝިއާ މޮންޗެންގްލެޑްބެކްއާއެކު ހަދާފައިވާ ކޮންޓްރެކްޓް ހަމަވުމާއެކު އިންޓަ މިލާނުން ހިލޭ ޓްރާންސްފާއެއްގެ ދަށުން ފްރާންސްގެ ވިންގަރު މާކަސް ތުރާމްގެ ސޮއި ހޯދައިފި އެވެ.

ކުރީގެ ބާސެލޯނާ އަދި ޔުވެންޓަސްގެ ޑިފެންޑަރު އަދި ފްރާންސްއާއެކު 1998 ގެ ވޯލްޑްކަޕް ހިއްލާލި ޑިފެންޑަރުގެ ދަރި 25 އަހަރުގެ ތުރާމް ވަނީ މޮންޗެންގްލެޑްބެކްއަށް ކުޅެދިން 134 މެޗުން 44 ގޯލު ޖަހާދީފަ އެވެ.

ތުރާމް މޮންޗެންގްލެޑްބެކަށް ބަދަލުވީ 2019 ވަނަ އަހަރު ލީގު އެކެއްގެ ގުއިންގަމްޕް ދޫކޮށްލާފަ އެވެ. މިދިޔަ އޭޕްރީލް މަހު މޮންޗެންގްލެޑްބެކްއިން ވަނީ ތުރާމް އޭނާގެ އެއްބަސްވުން އާނުކުރަން ނިންމާފައިވާކަން ވެސް ހާމަކޮށްފަ އެވެ.

އަދި ވޭތުވެދިޔަ މަސްތަކުގެ ތެރޭގައި އޭނާ ޔޫރަޕުގެ އެކި ކުލަބްތަކަށް ބަދަލުވާނެކަމަށް އަޑު އެރި އެވެ. ތުރާމްވަނީ ފްރާންސަށް ބައިނަލްއަގްވާމީ 10 މެޗު ކުޅެދީފަ އެވެ. އޭނާ ފްރާންސަށް ގައުމީ ޓީމަށް ކުޅެދިން ފުރަތަމަ މެޗަކީ 2020 ވަނަ އަހަރުގެ ނޮވެމްބަރު މަހު ފިންލޭންޑާ ދެކޮޅަށް ކުޅުނު މެޗެކެވެ.

އޭނާ ވަނީ މިދިޔަ އަހަރުގެ ވޯލްޑް ކަޕުގެ ފައިނަލުގައި ޕެނަލްޓީ ޖަހައިގެން އާޖެންޓީނާ އަތުން ފްރާންސް ބަލިވި މެޗުގައި ބަދަލު ކުޅުންތެރިއެއްގެ ގޮތުގައި ކުޅެން އަރާފަ އެވެ.