ރިޓަޔަމެންޓް ޕެންޝަން އުސޫލަށް ބަދަލު ނުގެނައުމަށް ނިންމައިފި

ވަޒީފާއިން އަލަށް ރިޓަޔާވާ މުވައްޒަފުންނަށް މަހުން މަހަށް ދެމުން އަންނަ އެލަވަންސްއަށް ބަދަލު ނުގެނައުމަށް ސަރުކާރުން ނިންމައިފިއެވެ.

މުވައްޒަފުންގެ ކަންބޮޑުވުންތަކެއް ހުރުމާއެކު، ރައީސުލްޖުމްހޫރިއްޔާ، އިއްޔެ ބޭއްވެވި ވަޒީރުންގެ މަޖިލީހަށް ހުށަހަޅުއްވައި ފުޅާ ދާއިރާއެއްގައި މަޝްވަރާކުރެއްވުމަށްފަހު މާލީ ވުޒާރާއިން ފޮނުވާފައިވާ ސިޓީއަށް އަމަލުނުކުރައްވަންވަނީ ނިންމަވާފައިކަމަށް ރައީސް އޮފީހުން ވިދާޅުވިއެވެ.

މާލީ ވުޒާރާއިން ވިދާޅުވީ ސަރުކާރުގެ މުވައްޒަފުންގެތެރެއިން ޑަބަލް ޕެންޝަން ނުވަތަ ދެ ޕެންޝަނުގެ ގޮތުގައި މަހުންމަހަށް ލިބޭ އަދަދަށް ބަދަލު ނުގެނައުމަށް ނިންމެވީ އެގޮތަށް އިނާޔަތްލިބޭ ވަރަށް ގިނަ މުވައްޒަފުންތަކެއް ތިބުމާއި ގުޅިގެން، އެހާ ގިނަ ދުވަހު ލިބެމުން އައި އިނާޔަތެއް ކަނޑާލުމަކީ އެފަރާތްތަކުގެ ކަންބޮޑުވުމެއްކަމަށް ޤަބޫލުކުރެވޭތީކަމަށެވެ.

ސަރުކާރުގެ ވަޒީފާއިން އަލަށް ރިޓަޔާވާ ނުވަތަ މުސްކުޅިކުރެވޭ މުވައްޒަފުންނަށް ޕެންޝަން ސްކީމްގެ ބޭރުން އިތުރު މަހު އެލަވެންސް ނުދޭން ސަރުކާރުން ކުރިން ނިންމެވިއެވެ. އެއީ އަސާސީ ޕެންޝަންގެ ތެރެއިން ލިބޭ ފައިސާގެ އިތުރުން، ވަކިވަކި އިދާރާތަކުން އަމިއްލައަށް ހިންގާ ރިޓަޔަމެންޓް ސްކީމްތަކުން ދޭ ފައިސާގެ އިނާޔަތް އެއްހަމަ ކުރުމުގެ ބޭނުމުގައެވެ.

ސަރުކާރުން ދެމުން އަންނަ ޕެންޝަންގެ ދަށުން، އެ ސްކީމަށް މިއަހަރު 266 މިލިޔަން ރުފިޔާ ހޭދަކުރާއިރު އަންނަ އަހަރު 272 މިލިޔަން ރުފިޔާ ހޭދަވާނެކަމަށް ދައުލަތުގެ ބަޖެޓުގައި ލަފާކޮށްފައިވެއެވެ.

ޑަބަލް ޕެންޝަން ނުވަތަ ދެ ޕެންޝަން ލިބިދޭ ނިޒާމަކީ ދައުލަތަށް ބުރަބޮޑު އަދި ދެމެހެއްޓެނިވި ނިޒާމެއް ނޫންކަމަށް ބައިނަލްއަޤްވާމީ މާލީ އިދާރާތަކުންނާއި، އޮޑިޓަރ ޖެނެރަލްވެސް ލަފާދެއްވާފައިވާތީއެވެ. އޮޑިޓަރ ޖެނެރަލް ވަނީ ޕެންޝަން ނިޒާމު އެއްހަމަކޮށް ދައުލަތުގެ އިޝްރާފު ކުޑަކުރުމަށް ލަފާދެއްވާފައެވެ.