މެދުއިރުމަތީގެ އަވައްޓެރި ގައުމުތަކަށް އިރާނުން ދެމުންގެންދާ ހަމަލާތައް ހުއްޓާލަން ނިންމާފައިވާ ކަމަށް އިރާނުގެ ރައީސް މައްސޫދު ޕެޒެޝްކިއަން ވިދާޅުވެއްޖެ އެވެ.
އިރާނުގެ ރައީސް ވިދާޅުވީ އަވައްޓެރި ގައުމުތަކުން އެގައުމެއްގެ މިލިޓަރީ ބޭސް އަކުން ސީދާ ހަމަލާއެއް ނާންނަ ހިނދަކު އިރާނުން އެގައުމަކަށް ހަމަލާ ނުދޭނެ ކަމަށެވެ.
އެމެރިކާއާއި އިސްރޭލުން ފަށާފައިވާ ހަނގުރާމައިގެ އަސަރުތައް ޓެހްރާނުން ފެށިގެން ގޮސް ގަލްފުގެ ގައުމުތަކަށް ކުރަމުންދާއިރު ހަނގުރާމަ ނުހުއްޓި ކުރިއަށްދާތާ ދެހަފްތާ މިވަނީ ވެފަ އެވެ.
އަދި އެމެރިކާގެ ރައީސް ޑޮނަލްޑް ޓްރަމްޕް ވަނީ މިއަދު އިރާނަށް ދެމުންދާ ބޮމުގެ ހަމަލާތައް ވަރުގަދަކުރާނެ ކަމުގެ އިންޒާރުވެސް ދީފަ އެވެ. ސޯޝަލް މީޑިއާގައި ޓްރަމްޕް ޕޯސްޓްކުރި ޕޯސްޓްގައި ބުނެފައިވަނީ މިއަދު އިރާނަށް ވަރުގަދަ ހަމަލާތަކެއް ދޭނެ ކަމަށެވެ.
ޓްރަމްޕްވަނީ އެމެރިކާއިން އިރާނުގެ ކަނޑުމަތީގެ 42 އަސްކަރީ އުޅަނދެއް ވެސް 3 ދުވަސް ތެރޭގައި ގޮއްވާލާފައިވާ ކަމަށް ބުނެފަ އެވެ. މީގެއިތުރުން އިރާނުގެ އަސްކަރިއްޔާއިން ބުނި ގޮތުގައި ގަލްފަށް ވަންނަ "ދުޝްމަނުން"ގެ އަސްކަރީ އުޅަނދުތައް ކަނޑުގެ އެންމެ އަޑިއަށް ދުއްވާލާނެ ކަމަށެވެ.
