ދުއްވަން އިން ބައިސްކަލުގެ މުއްގަޑުގެ ތެރެއިން މަސްތުވާތަކެތި ފެނިގެން ކުޅުދުއްފުށީ މީހަކު ހައްޔަރުކޮށްފި

ދުއްވަން އިން ބައިސްކަލުގެ ހުންގާނު މުއްގަޑުގެ ތެރެއިން މަސްތުވާތަކެތި ފެނިގެން ކުޅުދުއްފުށިން ފުލުހުންގެ ބެލުމުގެ ދަށަށް މީހަކު ގެންގޮސްފި އެވެ.

ފުލުހުން ބުނީ މިއަދު ހަވީރު ފުލުހުންނަން ލިބުނު އިންޓެލިޖެންސް މައުލޫމާތަކާ ގުޅިގެން މިއަދު ހަވީރު 05:10 ގައި ކުޅުދުއްފުށީގައި ފުލުހުން ހިންގި އޮޕަރޭޝަނެއްގައި 23 އަހަރުގެ މީހަކު ހައްޔަރުކޮށްފައިވާ ކަމަށެވެ.

މިމީހާ ހުއްޓުވާ ބަލާ ފާސްކުރިއިރު އެމީހާ ދުއްވަން އިން ބައިސްކަލުގެ ކާނަތު މުއްގަޑު ތެރެއިން މަސްތުވާ ތަކެތި ކަމަށް ޝައްކުކުރެވޭ 5 ރަބަރު ޕެކެޓް ރައްކާ ކޮށްފައި ހުއްޓާ ފެނިފައިވާ ކަމަށް ފުލުހުން މައުލޫމާތު ދެއެވެ.

މީނާ ހައްޔަރު ކޮށްފައިވަނީ ޖަލާލުއްދީން ސްކޫލު ކައިރިންނެވެ. ފުލުހުން މައުލޫމާތު ދޭގޮތުގައި މީނާ އަކީ ވައްކަމާއި މަސްތުވާތަކެތީގެ ރެކޯޑް އޮންނަ މީހެކެވެ.

މިމައްސަލަ މިހާރު ދަނީ ކުޅުދުއްފުށީ ފޮލިސްޓޭޝަނުން ތަހްގީގު ކުރަމުންނެވެ.