ޖަލާލުއްދީން ސްކޫލުގެ ދަރިވަރުން ސައިންސް އެކްސްޕެރިމެންޓްތައް ދައްކާލައިފި

ޖަލާލުއްދީން ސްކޫލްގެ ސައެންސް ޑޭ ފާހަގަ ކުރުމުގެ ގޮތުން މިއަދު އެ ސްކޫލުގެ ދަރިވަރުން ސައިންސް އެކްސްޕެރިމެންޓްތައް ދައްކާލައިފި އެވެ.

މިއަދު ޖަލާލުއްދީން ސްކޫލުގައި އޮތް ސައެންސް ޑޭ ގައި 24 ދަރިވަރަކު ވަނީ ކެމިސްޓްރީ، ބައޮލޮޖީ، ފިޒިކްސް އަދި ފިޝަރިޒް ސައެންސް ގެ މާއްދާތަކުން ތަފާތު އެކްސްޕެރިމެންޓްތައް ލެބޯޓްރީގައި ދައްކާލާފަ އެވެ.

ޖަލާލުއްދީން ސްކޫލުން މައުލޫމާތު ދޭގޮތުގައި ސައެންސްޑޭ އަކީ، ގުރޭޑް 10 ގެ ސައެންސްގެ މާއްދާތައް ކިޔަވާ ދަރިވަރުންގެ ތެރެއިން ހޮވާލެވޭ ދަރިވަރުންނަށް، އޯލެވެލް އިމްތިހާނުގެ ‘އޯލްޓަނޭޓިވް ޓު ޕްރެކްޓިކަމް’ ޕޭޕަރުގައި ހުންނަ ސްވާލުތަކަށް އަމަލީގޮތުން ޖަވާބުދިނުމަށް ފަރިތަކުރުވުމުގެ ގޮތުން ހިންގުނު ހަރަކާތެވެ.

ސައިންސް ޑޭގެ ހަރަކާތްތައް ނިންމުމަށް މިއަދު ހަވީރު ބޭއްވި ރަސްމިއްޔާތު ޝަރަފްވެރިކޮށްދެއްވީ އެޑިޔުކޭޝަން މިނިސްޓްރީގެ ސްޕްރިންޓެންޑެންޓް އިބްރާހީމް ރަޝީދެވެ. ޝަރަފްވެރިމެހެމާންގެ ވާހަކައިގައި އޯލެވެލް އިމްތިހާނު ފެށުމަށް މިހާރު މިއޮތް ކުޑަ ދުވަސްކޮޅުތެރޭގައި ބުރަކޮށް މަސައްކަތް ކުރުމަށް ދަރިވަރުންގެ ކިބައިން އެދިލެއްވިއެވެ. އަދި ކިޔެވުމާއި ހުރިހާ ކަމެއްގައި އިޚްލާޞްތެރިވުމަށް ދަރިވަރުންނަށް ގޮވާލެއްވިއެވެ.

ސައެންސް ޑޭގެ ހަރަކާތްތަކުގައި، ސައެންސްގެ މާއްދާތައް ކިޔަވައިދެއްވާ 15 ޓީޗަރުން ދަރިވަރުންނަށް އެހީތެރިވެދެއްވިއެވެ. ސައެންސް ޑޭގެ ހަރަކާތްތައް ހިނގަމުންދިޔައިރު ދަރިވަރުންނަށް ހެނދުނުގެ ނާސްތާ އާއި ހަވީރު ސައި ތައްޔާރުކޮށްދެއްވީ ބެލެނިވެރިންނެވެ.