ބާދުޝާހުގެ އިންޖީނަށް ދިމާވި މައްސަލަ ހައްލުކޮށް މިއަދު ހެނދުނު މާލޭގައި ބަނދަރުކޮށްފި

އިއްޔެ ކުޅުދުއްފުށިން ފުރައިގެން މާލެއަށް ދަތުރުކުރަމުންދަނިކޮށް ބާދުޝާހު ބޯޓުގެ އިންޖީނަށް ދިމާވި މައްސަލަ ހައްލުކުރުމަށްފަހު މިއަދު ހެނދުނު 9:40 ގައި މާލޭގައި ބަނދަރުކޮށްފި އެވެ.

ބާދުޝާހުން ވާހަކަދެއްކި މީހަކު ބުނީ ފިއުލް ޕަންޕަށް ގުޅާފަ އިން ހޮޅިއެއް ބިންދައިގެން ދިއުމުގެ ސަބަބުން އިންޖީނު ހުއްޓާލައި ނ. ދޮޅިޔަދުއަށް ބޯޓު ބަނދަރުކޮށްފައިވަނީ ރޭ 10 ޖަހާކަންހާއިރު ކަމަށެވެ. އެރަށަށް ލެފުމަށްފަހު ވޯކްޝޮޕަކަށް ހޮޅި ހިފައިގެންގޮސް ހޮޅި ބައްދައިގެން އަނެއްކާވެސް ދަތުރުފަށާފައިވާކަމަށް އޭނާ ބުންޏެވެ.

ބޯޓުގެ އިންޖީނަށް ދިމާވި މައްސަލައިގެ ސަބަބުން އެއްވެސް ފަސެންޖަރަކަށް އެއްވެސް ގެއްލުމެއް ނުލިބޭ ކަމަށާއި މިގޮތަށް ދިމާވާ ކުދިކުދި މައްސަލަތަކުގެ ސަބަބުން ބޯޓުން ދަތުރުކުރުމަށް އެއްވެސް ފަރާތަކުން ފަސްނުޖެހުމަށް އޭނާ ވަނީ ގޮވާލާފަ އެވެ.

ރޭގެ މި ހާދިސާގައި އެއްވެސް އިތުރު ފަރާތެއްގެ އެހީ ހޯދާފައި ނުވާކަމަށާއި ބޯޓުގެ ޝެޑިއުލާއި އެއްގޮތަށް ދަތުރުތައް ކުރިއަށްދާނެ ކަންވެސް އޭނާ ފާހަގަކުރި އެވެ.

އިންޖީނަށް ޑީސަލް ފޯރުކޮށްދިނުމަށް އިން ހޮޅި ބިންދައިގެން ދިޔަ ސަބަބެއް ނޭނގޭއިރު ބޯޓުން އިއްޔެ ވަނީ 135 މީހަކު ދަތުރުކޮށްފަ އެވެ.