ކުޅުދުއްފުށީ ބާޒާރުގައި ފިޔާގެ އަގު ވަރަށް ބޮޑުތަން ހެޔޮވެއްޖެ

ގިނަ ދުވަސްތަކެއް ވަންދެން ފިޔާގެ އަގު އެއްވަރެއްގައި ހިފެހެއްޓިފައި ހުރުމަށްފަހު ކުޅުދުއްފުށީ ބާޒާރުގައި ފިޔާގެ އަގު ވަރަށް ބޮޑު ތަން ދަށް ވެއްޖެ އެވެ.

ފިޔާގެ އަގު ދަށަށް ދިޔައީ އިންޑިޔާއިން ފިޔާ ވިއްކާ އަގު ދައްވުމާ ގުޅިގެން ކަމަށް ކުޅުދުއްފުށީގެ ވިޔަފާރިވެރިން ބުނި އެވެ. އަދި މާލެއިން ފިޔާ ލިބެން ހުންނަ އަގު ދަށްވެފައިވާ ކަމަށް އެފަރާތްތަކުން މައުލޫމާތު ދެއްވަ އެވެ. އެގޮތުން ރާއްޖެއަށް އެންމެ ގިނައިން ފިޔާ އެތެރެކުރާ އިންޑިޔާއިން 1500 ޑޮލަރަށް ލިބެންހުރި ފިޔާ ޓަނެއްގެ އަގު މި އަހަރު ޖެނުއަރީ މަހުގެ ތެރޭގައި ވަނީ 500 ޑޮލަރަށް ތިރިކޮށްފަ އެވެ. އެހެންކަމުން މިދިޔަ އަހަރު ފަހުކޮޅު 750-800 ދެމެދު ހުރި ފިޔާ ބަސްތާއެއްގެ އަގު 350ރ އަށް ހެޔޮވި އެވެ.

މިހާރު ކުޅުދުއްފުށީގައި ފިޔާ ބަސްތާއެއްގެ އެންމެ ހެޔޮ އަގަކީ 180ރ އެވެ. އެއީ ކުޅުދުއްފުށީ މިތުރު ފިހާރައިންނާއި އާޕޮއިންޓު އަދި ވަފާ ފިހާރައިންނެވެ. މިއަހަރު ފެށުނު އިރު 20ރ އާއި 23ރ އާ ދެމެދު ހުރި ފިޔާ ކިލޯއެއްގެ އަގު މިހާރުވަނީ ކުޅުދުއްފުށީ ބާޒާރުގައި އެންމެ 10ރ އަށް ދަށް ވެފަ އެވެ.

ފިޔާގެ އިތުރުން ކުކުޅު ބިހާއި އަލުވި ވިއްކާ އަގުތައްވެސް ވަނީ ހެޔޮވެފަ އެވެ. ކުޅުދުއްފުށީ ބާޒާރުގައި އަލުވި ކިލޯ އެއް 15ރ އަށް ލިބެން ހުރިއިރު އަލުވި ބަސްތާއެއްގެ އަގު އުޅެނީ 220ރ އަށެވެ.