ސެމްސަންގެ އެންމެ ފަހުގެ ދެ ފޯނު ދިރާގުން ވިއްކަން ފަށައިފި

ސެމްސަންގ ކުންފުނީގެ އެންމެ ފަހުގެ އުފެއްދުން ކަމަށްވާ “ސެމްސަންގ ގެލެކްސީ އެސް 6” އާއި “ސެމްސަންގ ގެލެކްސީ އެސް 6 އެޖް” ދިރާގުން ރާއްޖޭގައި ވިއްކަން ފަށައިފި އެވެ.

ދިރާގުންމި ފޯނުތައް ރާއްޖޭގެ ބާޒާރަށް ނެރެފައިވަނީ ދުނިޔޭގެ ބާޒާރަށް މި އުފެއްދުން ނެރުނުތާ ކުޑަ ވަގުތުކޮޅެއްގެ ތެރޭގަ އެވެ.

“ގެލެކްސީ އެސް 6” 13030 ރުފިޔާ ދިރާގުން ލިބެން ހުންނާނެއިރު “ގެލްކްސީ އެސް 6 އެޖް” ލިބެން ހުންނާނީ 15375 ރުފިޔާ އަށެވެ.

ސެމްސަންގު ކުންފުނީގެ އިސްވެރިންވެސް ބައިވެރިވި ހާއްސަ ރަސްމިޔާތެއްގައި މި ދެ ފޯނު ރާއްޖެއަށް ތައާރަފުކޮށްފައިވަނީ މިކަމަށްޓަކައި ރޭ ދިރާގު ހެޑް އޮފީހުގައި ބޭއްވި ހާއްސަ ރަސްމިޔާތެއްގައެވެ.

މި ފޯނުތަކަށް ޕްރީ އޯޑާކުރުމަށް ދިރާގުން ހުޅުވާލި ފުރުސަތުގައި 1000 އަށްވުރެ ގިނަ މީހުން ޕްރީއޯޑާކޮށްފައިވާއިރު އެޑްވާންސް ފައިސާ ދެއްކި ކަސްޓަމަރުންނަށް ރޭ ވަނީ ފޯނު ދޫކޮށްފަ އެވެ.

ދިރާގަކީ ސެމްސަންގ ގެލެކްސީ އެސް6 ސީރީޒްގެ ފޯނުތައް ބޭނުންކުރުމަށް ‘އޮފިޝަލް ކެރިއާ’ގެ ގޮތުގައި ސެމްސަންގުން އެންޑޯސްކޮށްފައިވާ ނެޓްވާކެވެ. ސެމްސަންގެ ނޭޝަނަލް އޮތޮރައިޒްޑް ޑިސްޓްރިބިއުޓަރަކީ ހައިކް މޯލްޑިވްސް އެވެ.