ދިރާގުން އިންޓަނެޓްގެ ހިދުމަތް ހިލޭ ގުޅައިދެނީ

ދިރާގުން ފިކްސް ބްރޯޑްބޭންޑް ޕެކޭޖުތަކަށް އެދިލައްވާ ފަރާތްތަކަށް އިންޓަނެޓް ކަނެކްޝަން ހިލޭ ގުޅައި ދިނުމުގެ ޕްރޮމޯޝަނެއް ފަށައިފިއެވެ.

31 ޑިސެމްބަރުގެ ނިޔަލަށް ކުރިއަށް ގެންދާ މި ޕްރޮމޯޝަނުގެ ދަށުން ދިރާގު ބްރޯޑްބޭންޑް ހުރިހާ ޕެކޭޖްތައް ނެގޭނެ ކަމަށް އެ ކުންފުނިން ބުނެއެވެ. އެގޮތުން ބްރޯޑްބޭންޑް 2އެމް އަންލިމިޓެޑް ޕެކޭޖުން ފެށިގެން ފައިބަރ 100އެމް ޕެކޭޖާއި ހަމައަށް އަދި ހުރިހާ ބިޒްނަސް ޕެކޭޖްތަކެއްވެސް މި ޕްރޮމޯޝަންގެ ދަށުން ނަގާ ކޮންމެ ފަރާތަކަށް އިންޓަނެޓްގެ މުޅިން ހިލޭ ގުޅައިދެވޭނެއެވެ.

ދިރާގުގެ ބްރޯޑްބޭންޑް އެންޑް ޑޭޓާ ސާވިސެސްގެ މާކެޓިންގ މެނޭޖަރ މުހައްމަދު ފާހިރު ވިދާޅުވީ މި ޕްރޮމޯޝަން އަމާޒުކޮށްފައިވަނީ އަލަށް އިންޓަނެޓްގެ ހިދުމަތައް އެދިލައްވަން ބޭނުންވާ އަދި އެކަން ހެޔޮ އަގެއްގައި ކޮށްލުމަށް ބޭނުންވާ ފަރާތްތަކަށް ކަމަށެވެ. އަދި އާއަހަރަށް އިންޓަނެޓްގެ ހިދުމަތައް އެދިލައްވަން މިއީ އެންމެ އެކަށީގެންވާ ދުވަސްވަރު ކަމުގައި މުހައްމަދު ފާހިރު ވިދާޅުވިއެވެ.

ދިރާގުން ވިޔަފާރިއާއި އެހެނިހެން ބޭނުންތަކަށް ހެޔޮވަރު، އެންމެ ބޭސިކް ޕެކޭޖުތަކުން އެންމެ ހައި ސްޕީޑުގެ ޕެކޭޖުތައް ލިބެން ހުރިއިރު ދާދިފަހުން 1 ޓީބީގެ އެލަވެންސް ހިމެނޭ ވިޔަފާރިޔަށް ހާއްސަ ޕެކޭޖުތަކެއް ތައާރަފްކޮށްފަ ވެއެވެ.