ބީއެމްއެލްއިން ރާއްޖެއިން ބޭރުގައި ވިސާ ކާޑު ބޭނުންކުރެވޭ ލިމިޓް އިތުރުކޮށްފި

ބޭންކް އޮފް މޯލްޑިވްސް އިން ރާއްޖެއިން ބޭރުގައި ވިސާ ޑެބިޓް ކާޑު ބޭނުން ކުރެވޭ ލިމިޓް އިތުރުކޮށްފި އެވެ.

ބީއެމްއެލް އިން ބުނީ މިހާރު ރާއްޖެއިން ބޭރުގެ އޭޓީއެމްތަކުން ދުވާލަކަށް 400 ޑޮލަރާ އެއްވަރަށް ފައިސާ ނެގޭނެ ކަމަށާއި ޕީއޯއެސްތަކުން ދުވަލަކަށް 600 ޑޮލަރުގެ ވިޔަފާރި ކުރެވޭނެ ކަމަށެވެ.

އެގޮތުން މި ބަދަލާއެކު ރާއްޖެއިން ބޭރުގައި ބީއެމްއެލްގެ ވިސާ ޑެބިޓް ކާޑު މެދުވެރިކޮށް ކަސްޓަމަރުންނަށް ދުވާލަކު ޖުމްލަ 1000 ޑޮލަރު ބޭނުންކުރެވޭނެއެވެ.

މީގެ ކުރިން ކަސްޓަމަރުންނަށް ބޭނުންކުރެވެނީ ދުވާލަކަށް 600 ޑޮލަރެވެ.

މި ބަދަލަކީ ކަސްޓަމަރުންގެ ހިޔާލާއި ބޭންކުން ކަސްޓަމަރުންނަށް ދޭ ހިދުމަތް އިތުރަށް ފުޅާކުރުމުގެ ގޮތުން ގެނެވުނު ބަދަލެއް ކަަމަށް ބީއެމްއެލް އިން ބުނެއެވެ.

ބީއެމްއެލްގެ ރީޓެއިލް ބޭންކިން ޑައިރެކްޓަރ މުހައްމަދު ޝަރީފް ވިދާޅުވީ މި ބަދަލަކީ ރާއްޖެއިން ބޭރަށް ވަޑައިގެންނަވާ އަދި ބޭރުގައި ކިޔަވަން ތިބޭ ފަރާތްތަކަށް ލިބޭނެ އުފާވެރި ހަބަރެއް ކަމަށް ގަބޫލު ކުރާ ކަމަށެވެ.