ތިންވަނައަށް އެންމެ ރަނގަޅު ކޯލް ސެންޓާ ދިރާގު ކަސްޓަމާ ސާވިސް

ދުނިޔޭގެ ކޯލް ސެންޓަރުތަކުގެ އެންމެ ބޮޑު ޖަމިއްޔާ ކަމުގައިވާ ކޮންޓެކްޓް ސެންޓާ ވޯލްޑު ވަނީ މީޑިއަމް ކެޓަގަރީގެ ބެސްޓް އިން ކަސްޓަމާ ސާވިސް އެވޯޑު ދިރާގަށް ދީފައެވެ. އަދި ދިރާގުގެ ކަސްޓަމާ ސާވިސް އަށް ލިބުނީ ދެކުނު އޭޝިއާ އަދި ޕެސިފިކް ސަރަހައްދުން ބްރޯންޒް އެވޯޑެވެ.

މި އެވޯޑަކީ ކޯލް ސެންޓަރުތަކުގެ ހިދުމަތުގެ ފެންވަރު ދެމެހެއްޓުމުގައި ޓެކްނޮލޮޖީގެ ބޭނުން ކުރާ މިންވަރާއި މަސައްކަތުގެ މާހައުލާއި ކުރެވޭ މަސައްކަތް އެސެންޓަރެއްގައި މަސައްކަތް ކުރާ މުވައްޒަފުން ބާރުވެރިކުރުމާއި އަގުވަޒަންކުރުމުގެ މައްޗަށް ބިނާވެފައި އޮންނަ މިންވަރަށް ބެލުމަށް ފަހު ދެވޭ އެވޯޑެކެވެ. އަދި މުވައްޒަފުންނަށް ދެވޭ ތަމްރީންތަކާއި އެ ތަމްރީންތަކުގެ ފެންވަރަށްވެސް މި އެވޯޑު ދިނުމުގައި ބަލާ ކަމަށް ދިރާގުން މައުލޫމާތު ދެއްވައެވެ.

އޭޝިއާ ޕެސިފިކް ސަރަހައްދުގައި ތަރައްގީވެފައިވާ ބައެއް ގައުމުތަކުގެ ބޮޑެތި ކުންފުނިތަކާ ވާދަ ކޮށްގެން މި އެވޯޑު ލިބުނީ ދިރާގަ ށެވެ.

ދިރާގުގެ ފްރަންޓް އޮފީހަކަށް ޒިޔާރަތް ކުރާ ކަސްޓަމަރަކަށް ލިބޭނެ ހުރިހާ ޚިދުމަތެއް ކަހަލަ ގޮތަކަށް ދިރާގު ކަސްޓަމާ ސާވިސް އަށް ގުޅައިގެން ފޯނު މެދުވެރިކޮށް ލިބޭނެ ކަމަށް އެކުންފުނީގެ ކޮންޓެކްޓް ސެންޓަރުގެ މެނޭޖަރު މުހައްމަދު އަޒްލީމް ދިރާގަށް އެ އެވޯޑު ލިބުމާ ގުޅިގެން ވިދާޅުވި އެވެ.

ހދ. ކުޅުދުއްފުށީ އޮޕަރޭޝަންސް ސެންޓަރާއި މާލޭގެ ހެޑްއޮފީހުގައި ދިރާގުގެ ކޮންޓެކްޓް ސެންޓަރަށް ނިސްބަތްވާ ޖުމްލަ 90 އަށްވުރެ ގިނަ މުއައްޒަފުން ދަނީ މަސައްކަތް ކުރަމުންނެވެ. އަދި ދިރާގުގެ ކޮންޓެކްޓް ސެންޓަރަކީ އެއްފަހަރާ އެންމެ ގިނަ އެޖެންޓުން ހިދުމަތްދޭ އަދި އެންމެ ގިނަ ކޯލްތަކަށް ޖަވާބުދޭ ކޮންޓެކްޓް ސެންޓަރެވެ. ދިރާގުގެ ރަސްމީ ރެކޯޑްތައް ދައްކާގޮތުން އެ ސެންޓަރުން ދުވާލެއްގެ މައްޗަށް ޖުމްލަ 18000 ކޯލަށް ޖަވާބުދޭ ކަމަށް އެކުންފުނިން މައުލޫމާތު ދެއެވެ.