އޮންލައިން ވިޔަފާރިތަކުން ހާއްސަ ލޯގޯއެއް ބޭނުންކުރަންޖެހޭ ގޮތަށް މީރާއިން ހަދައިފި

އޮންލައިން ވިޔަފާރީގެ ގޮތުގައި ޖީ.އެސް.ޓީއަށް ރަޖިސްޓަރީކޮށްފައިވާ ވިޔަފާރިތަކުން ހާއްސަ ލޯގޯއެއް ބޭނުންކުރަންޖެހޭ ގޮތަށް މީރާއިން ކަނޑައަޅައިފި އެެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނުގެ ދަށުން މީރާގައި ރަޖިސްޓަރީކޮށްފައިވާ ފަރާތަކުން އޮންލައިންކޮށް ވިޔަފާރިކުރާނަމަ އެވިޔަފާރި ހިންގަން ބޭނުންކުރާ އޮންލައިން ޕޯޓަލްގައި މީރާއިން ކަނޑައަޅައިފައިވާ ލޯގޯއެއް ފެންނަން ހުންނަންޖެހޭނެ ކަމަށް މީރާއިން ވަނީ ބުނެފައެވެ.

މިފަދަ ލޯގޯއެއް ތައާރަފުކުރުމުގެ މަގުސަދަކީ އެފަރާތްތަކަކީ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތެއްކަން ކަސްޓަމަރުންނަށް އެނގޭނެފަދަ ގޮތަކަށް ހަމަޖެއްސުން ކަމަށް މީރާއިން މައުލޫމާތު ދެއެވެ.

އޮންލައިންކޮށް ޖީ.އެސް.ޓީއަށް ރަޖިސްޓަރީކޮށްފައިވާ ވިޔަފާރިކުރާ ފަރާތްތަކުން ބޭނުންކުރަންޖެހޭ މި ލޯގޯގައި ޓެކްސް ދައްކާ ފަރާތުގެ ނަމާއި ޓިން ހިމެނޭނެ އެވެ. އަދި މި ލޯގޯއަށް އެދުމަށް މީރާގެ ވެބްސައިޓް މެދުވެރިކޮށް އެފަރާތެއްގެ މައުލޫމާތު ހުށަހެޅުއްވުމުން މީރާގައި ރަޖިސްޓަރީކޮށްފައިވާ އީމެއިލް އެޑްރެސްއަށް ލޯގޯ ފޮނުވާދެވޭނެ ކަމަށް މީރާއިން މައުލޫމާތު ދެއެވެ.