އުރީދޫއިން ސައިޓެކް ކިޑްސްގެ ނަމުގައި މާދަމާ މާލޭގައިކުޑަކުދިންގެ ހަވީރެއް ބާއްވަނީ

އުރީދޫގެ އެގާރަ ވަނަ އަހަރީ ދުވަސް ފާހަގަ ކުރުމަށްޓަކައި ކުރިއަށްގެންދާ ހާއްސަ ކެމްޕެއިންގެ ތެރެއިން ސައިޓެކް ކިޑްސްގެ ނަމުގައި ވަރަށް ހާއްސަ ކުޑަކުދިންގެ ހަވީރެއް މާދަމާ ބާއްވާނެކަމަށް އުރީދޫއިން މައުލޫމާތު ދީފިއެވެ.

މި އިވެންޓަކީ ކުޑަކުދިންނަށް ހާއްސަ ކުރެވިފައިވާ އެކްސްޕެރިމަންޓްތަކާއި ކުޅިވަރުތައް މެދުވެރިކޮށް ސައިންސާއި ޓެކްނޮލޮޖީއަށް އެކުދިން އަހުލުވެރިކޮށް އެކަންކަމާއި މެދު ކުދިންގެ ޝައުގުވެރިކަން އިތުރުކުރުމުގެ އަމާޒުގައި ބޭއްވޭ ހަރަކާތެކެވެ.

އުރީދޫގެ އެސިސްޓަންޓް މެނޭޖާ ޕީއާރް ނޫރާ އިބްރާހިމް ޒާހިރު ވިދާޅުވީ ފަހުގެ ޓެކްނޮލޮޖީތަކާއި އުފެއްދުންތައް މެދުވެރިކޮށް ޑިޖިޓަލް މޯލްޑިވްސް އެއް ގާއިމް ކުރުމުގެ މަސައްކަތަށް ކުރުމަށް އުރީދޫއިން ފުރިހަމަ އެއްބާރުލުން ދެއްވާކަމަށެވެ.

މިއަދުގެ ޑިޖިޓަލް ދުނިޔޭގައި ފަހި މުސްތަގްބަލެއް ބިނާ ކުރުމުގައި ސައިންސް އަދި ޓެކްނޮލޮޖީގެ ދައުރު ވަނީ ލާޒިމްވެފައި އެވެ. މިގޮތުން ކުރިއަށް އޮތް ޖީލަކީ އުފެއްދުންތެރި އަދި ޑިޖިޓަލް ޓެކްނޮލޮޖީތަކާއި ވިސްނުންތަކަށް އަހުލުވެރިވެފައިވާ ބަޔަކަށް ހެދުމަށްޓަކައި ސައިންސް އަދި ޓެކްނޮލޮޖީ އަށް ކުޑަކުދިންގެ ޝައުގުވެރިކަން އިތުރު ކުރާނެ ފަދަ ހަރަކާތްތަކެއް ކުރިއަށްގެންދިއުން މުހިއްމެވެ. އަޅުގަނޑުމެންގެ އުއްމީދަކީ ސައިޓެކް ކިޑްސް އަކީ ކުދިންނަށް މަޖާ އަދި ފައިދާ ހުރި ތަޖުރިބާ އަކަށް ވުން ކަމަށް ނޫރާ ވިދާޅުވިއެވެ.

ހުކުރުދުވަހުގެ ހަވީރު 4.00 އިން ފެށިގެން ކުޑަކުދިންގެ ބަގީޗާގައި ސައިޓެކް ކިޑްސް ބޭއްވިގެން ދާނެއެވެ.