ޑޮލަރު ވިއްކުމަށް ތައާރަފްކުރި އޮންލައިން ޑޮލަރ ބުކިންގ ޕޯޓަލްއަށް އެއްމަސް ފުރުން

ރާއްޖޭން ބޭރަށް ދަތުރުކުރާ ދިވެހިންނަށް ޑޮލަރު ވިއްކުމަށް ތައާރަފްކުރި އޮންލައިން ޑޮލަރ ބުކިންގ ޕޯޓަލްއަށް އެއްމަސް ފުރުނުއިރު 3.4 މިލިއަން ޑޮލަރު ގަތުމަށް ބުކިންގ ހަދާފައިވާ ކަމަށް ބޭންކް އޮފް މޯލްޑިވްސްއިން ބުނެފި އެވެ.

މިދިޔަ ޖެނުއަރީ މަހު ބީއެމްއެލްއިން ދިވެހިންނަށް ފަސޭހަކަމާއެކު ޑޮލަރު ފޯރުކޮށްދިނުމަށް އެބޭންކުން ތައާރަފްކުރި އޮންލައިން ޑޮލަރ ބުކިންގ ޕޯޓަލް މެދުވެރިކޮށް 7000 ދަތުރުވެރިން ބުކިން ހައްދާފައި ވެއެވެ. ބުކިންގ ހެދުމަށްފަހު ވެލާނާ އިންޓަނޭޝަނަލް އެއަރޕޯޓް ޑިޕާޗާ ޓާމިނަލްގެ ގޭޓް 4 ކުރިމަތީގައި ގާއިމްކޮށްފައިވާ ޚާއްސަ ކައުންޓަރުތަކުން ޑޮލަރު ނެގޭނެއެވެ.

ޑޮލަރު ދޫކުރުމަށް އެއަރޕޯޓްގައި ގާއިމްކޮށްފައިވާ ކައުންޓަރުން އެވްރެޖްކޮށް ދުވާލަކު 200 ކަސްޓަމަރުންނަށް ޑޮލަރު ދޫކޮށްފައިވާ ކަމަށް ބޭންކުން މައުލޫމާތު ދެއެވެ.

ބޭންކުންވަނީ މި ނިޒާމުގެ ތެރެއިން ޑޮލަރު ގަނެގެން ރާއްޖެއިން ބޭރަށް ދަތުރުކުރި ފުރަތަމަ ދިހަ ދަތުރުވެރިންނަށާއި އެއްހާސް ވަނަ ކަސްޓަމަރަށް ބޯނަސް ގިފްޓެއްގެ ގޮތުގައި މީހަކަށް 100 ޑޮލަރު ހަދިޔާކޮށްފައެވެ.