“ޑައިނަމިކް ކަރަންސީ ކޮންވަރޝަން” ގެ ހިދުމަތް ބީއެމްއެލްއިން ތައާރަފްކޮށްފި

ކާޑު ބޭނުންކޮށްގެން ބޭނުން ފައިސާއަކުން ވިޔަފާރިކުރެވޭ “ޑައިނަމިކް ކަރަންސީ ކޮންވަރޝަން” (ޑީސީސީ)ގެ ހިދުމަތް ބީއެމްއެލްއިން ތައާރަފްކޮށްފި އެވެ.

މި ހިދުމަތަކީ ރާއްޖެ އަންނަ ބިދޭސީންނަށް ކާޑު ބޭނުންކޮށްގެން އެމީހުންގެ އަމިއްލަ ގައުމުގެ ފައިސާއިން ވިޔަފާރިކުރެވޭ ހިދުމަތެކެވެ.

ޑީސީސީ ގެ ހިދުމަތް ރަސްމީކޮށް އިފްތިތާހުކޮށްފައިވަނީ މީރު އައިލެންޑް ރިސޯޓް އެންޑް ސްޕާގައި މިއަދު ބޭއްވި ރަސްމިއްޔާތެއްގައެވެ. މި ހިދުމަތަކީ ވިޔަފާރިތަކަށް ބޭންކުން ފޯރުކޮށްދޭ ހިދުމަތްތައް އިތުރަށް ފުޅާކުރުމަށް ކުރަމުންދާ މަސައްކަތުގެ ތެރެއިން ތައާރަފްކުރި ހިދުމަތެކަމަށާއި މި ހިދުމަތް ބޭނުންކޮށްގެން ރިސޯޓްތަކަށާއި ގެސްޓްހައުސްތަކަށް ޒިޔާރަތްކުރާ ފަތުރުވެރިންނަށް ޑޮލަރުގެ ބަދަލުގައި އެމީހުންގެ އަމިއްލަ ގައުމުގެ ފައިސާއިން ހިދުމަތްތަކަށް ފައިސާ ދެއްކުމުގެ ފުރުސަތު ހުޅުވިގެންދާނެ ކަމަށް ބޭންކުން މައުލޫމާތު ދެއެވެ.

ޑީސީސީގެ ހިދުމަތް ބޭނުންކުރެވޭނީ ވިސާ އަދި މާސްޓަރ ކާޑު ބޭނުންކޮށްގެން ކުރާ ވިޔަފާރިތަކަށެވެ.

އަދި މި ހިދުމަތުގައި އަމިއްލަ ގައުމުގެ ފައިސާއިން ވިޔަފާރިކުރުމުން، ފަތުރުވެރިންނާއި އަދި ވަޒީފާއާ ގުޅޭ ކަންކަމުގައި ރާއްޖެ އަންނަ ދަތުރުވެރިންނަށް އެމީހުން ކުރާ ވިޔަފާރިތަކަށް ޖުމްލަ ހޭދަވީ ވަރާއި އިތުރަށް ކުރެވޭ އެހެނިހެން ޗާރޖުތަކަށް އަރާ ވަރު އެމީހެއްގެ އަމިއްލަ ގައުމުގެ ފައިސާއިން ވަގުތުން އެނގޭނެއެވެ.

މި ހިދުމަތް ބޭނުން ކުރާ ވިޔަފާރިތަކަށް ލިބެންޖެހޭ އަދަދު ބޭންކުން ފޯރުކޮށްދޭނީ ދެ ފަރާތުން ކުރިންވެސް އެއްބަސްވެފައިވާ ކަރަންސީއިން ކަމަށް ބޭންކުން މައުލޫމާތު ދެއެވެ.