ކުޅުދުއްފުށީގައި ތަފާތު ގިނަ ކަނާ ލިބޭ ހިތްގައިމު ރެސްޓޯރެންޓެއް ހުޅުވައިފި

ޗައިނީސް އަދި އިންޑިއަން ފުޑާ އެކު ތަފާތު ގިނަ ކެއުންތައް ލިބޭ ހިތްގައިމު ރެސްޓޯރެންޓެއް މިރޭ ކުޅުދުއްފުށީގައި ހުޅުވައިފި އެވެ. މި ރެސްޓޯރެންޓް ހުންނާނީ ރައްވެހިގޭގަ އެވެ.

” ލެ ސްޓަންޒާ”ގެ ނަމުގައި ހުޅުވި މި ރެސްޓޯރެންޓް ހުޅުވައިދެއްވީ އެތަނުގެ އޯނަރު މަމްދޫހު އަލީ އާއި ނާއިލާ އަލީގެ ދަރިފުޅު މަރްޔަމް މަނާލެވެ.

މިރޭ ހުޅުވާ ހިދުމަތް ދޭ ފެށި މިރެސްޓޯރެންޓްގައި ވީއައިޕީގެ ބަޔަކާއި ލޯބިވެރިންނަށް ހާއްސަ ބައެއް އެކުލެވެ އެވެ. ލޯބިވެރިންނަށް ހާއްސަ ބައިގެ ޕްރައިވެސީ ވަރަށް ބޮޑުވާނެކަމަށް އެތަނުގެ އޮފިޝަލަކު ވިދާޅުވި އެވެ.

މި ރެސްޓޯރެންޓް ހުޅުވުމުގެ ހަފުލާގައި ވާހަކަދައްކަވަމުން އެތަނުގެ އޮފިޝަލަކު ވިދާޅުވީ މިއަދު ރެސްޓޯރެންޓް ހުޅުވުނު ނަމަވެސް އަދި ވަރުގަދައަށް ހިނގަން ފަށާނީ ރޯދަމަހަށްފަހު ކަމަށެވެ.

އޭނާ ވިދާޅުވީ ކުޅުދުއްފުށީގެ އެހެން ރެސްޓޯރެންޓްތަކާއި ތަފާތުކޮށް ހަފްތާއަކު ދެ ދުވަހު ބުފޭ އޮންނާނެކަމަށެވެ. ބުފޭ އޮންނާނީ ކޮންމެ ބުރާސްފަތި ދުވަހެއްގެ ރޭގަނޑު 20:00 ން 21:30 އަށެވެ. އަދި ކޮންމެ ހޮނިހިރު ދުވަހަކު ހެނދުނު 8:00 ން 9:30 އަށެވެ. ބުފޭއިން 60 ރުފިޔާއަށް ކެއުމުގެ ފުރުސަތު އޮންނާނެ އެވެ.