ޕްލާސްޓިކްގެ ބަދަލުގައި ބޭނުންކުރާ ތަކެތިން ޓެކްސް ކުޑަނުކުރާނަމަ ތިމާވެއްޓާ އަހުލުވެރިނުކުރެވޭނެ: އެޑިއުކޭޝަން މިނިސްޓަރ

ޕްލާސްޓިކް މަދުކުރުމަށް އޮތް ހައްލަކީ އެނޫން ގޮތެއް ބޭނުންކުރަން ފެށުން ކަމަށާއި އެ ގޮތަށް އަމަލުކުރަން އާންމުން އަހުލުކުރެވޭނީ ޕްލާސްޓިކްގެ ބާވަތްތަކުގެ ބަދަލުގައި ބޭނުންކުރާ ބާވަތްތަކުން ނަގާ ޓެކްސް ކުޑަކުރެވި މި ބާވަތްތައް ބޭނުންކުރުމަށް ހޭލުން ތެރިކުރުވައިގެންކަމަށް އެޑިއުކޭޝަން މިނިސްޓްރ އައިޝަތު އަލީ ވިދާޅުވެއްޖެވެ.

ކަނޑުތަކުގެ ދުވަހުގެ މުނާސަބަތުގައި ބޭއްވި ރަސްމިޔާތުގައި އެޑިއުކޭޝަން މިނިސްޓަރ ވިދާލުވީ ޕްލާޓިކުގެ ބާވަތްތަކުން ނަގާ ޓެކްސް އެތައް ގުނައެއް ބޮޑުކުރި އިރު އޭގެ ބަދަލުގައި ބޭނުންކުރާނެ ބާވަތްތަކުން ޓެކްސް ކުޑަކުރެވިފައިނުވާކަމަށެވެ. ޕްލާސްޓިކުގެ ބާވަތްތަކުންނަގާ ޓެކްސް ބޮޑުކުރިއިރު ޕްލާސްޓިކްގެ ބަދަލުގައި ބޭނުންކުރެވޭނެ ބާވަތްތަކުން ޓެކްސް ކުޑަނުކުރާނަމަ ތިމާވެއްޓާ ރައްޓެހި ގޮތްތަކަށް އަހުލުވެރިނުކުރެވޭނެކަމަށް ވެސް މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ ސްކޫލް ދައުރުގައި މިފަދަ ކަންކަމަށް ދަރިވަރުން އަހުލުވެރިކުރެވިއްޖެނަމަ ނަތީޖާ ފެންނާނެކަން ކަށަވަރުވާ ކަމަށެވެ. އެހެންކަމުން ތިމާވެއްޓަށް ހުރި އެންމެ ބޮޑު ނުރައްކާކަމަށްވާ ޕްލާސްޓިކާއި ދެކޮޅަށް ކުރާ މަސައްކަތުގައި ސްކޫލް ކުދިން އިތުރަށް ހޭލުންތެރިކުރުވުމުގެ މުހިއްމުކަން މިނިސްޓަރ ވަނީ ތަކުރާރުކޮށް ފާހަގަކުރައްވާފައެވެ.