ކުޅުދުއްފުށި ސިޓީ ކައުންސިލުން އިންތިޒާމުކޮށްގެން ބާއްވާ ބޮޑުތިލަދުންމަތީ ބޮޑުބާޒާރާއި އެޑްވެންޗާއަޕުން އިންތިޒާމުކޮށްގެން ކުރިއަށްގެންދާ އައިލެންޑް ކާނިވަލްގެ ހަރަކާތްތަކާއެކު ކުޅުދުއްފުއްޓަށް ބޮޑު އީދެއް އަތުވެއްޖެ އެވެ.
ބުދަ ދުވަހުގެ ހަވީރު ފެށިގެން އޮކްޓޯބަރު 4 ވަނަ ދުވަހުގެ ނިޔަލަށް ކުޅުދުއްފުށި ސިޓީގެ ބީޗް ހޭންޑްބޯލް އެރީނާ ސަރަހައްދުގައި ކުރިއަށްދާ މި ކުލަގަދަ ހަރަކާތަކީ މިހާތަނަށް އަތޮޅުތެރޭގައި ބޭއްވޭ މިފަދަ އެންމެ ބޮޑު ކާނިވަލެވެ. ފުރަތަމަ ދުވަހުވެސް މި ކާނިވަލަށް ގިނަ ކުޑަކުދިން ހިމެނޭހެން ގިނަ ބަޔަކު ޒިޔާރަތްކުރި އެވެ.
ބޮޑުތިލަދުންމަތީ ބޮޑުބާޒާރު ކުރިއަށްދާނީ، ކޮންމެ ދުވަހެއްގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 23:00 އަށެވެ.
މިއީ ކުޅުދުއްފުށީގެ އިގުތިސާދު ކުރިއެރުވުމަށާއި، މި ސިޓީގައި ހިންގަމުން އަންނަ ވިޔަފާރިތަކަށް އަމާޒުކޮށްގެން، އެ ވިޔަފާރިތައް އެއްފަހަރާ ބޮޑު މާކެޓަކަށް އިޝްތިހާރުކުރުމުގެ ފުރުސަތު ފަހިކޮށްދިނުމަށް ބާއްވާ ހަރަކާތެކެވެ. މީގެ އިތުރުން، ވިޔަފާރިވެރިންގެ އުފެއްދުންތަކާއި، ވިއްކާ މުދާ އެއްތަނަކުން ދައްކާލެވޭނެ އިންތިޒާމާއި، ބޮޑުތިލަދުންމަތީގެ ރައްޔިތުންނަށް ހެޔޮއަގުގައި އެކި ބާވަތްތަކުގެ މުދާ ގަނެވޭނެ މަގު ފަހިކޮށްދިނުމަކީ ވެސް މި ހަރަކާތުގެ މައިގަނޑު މަގުސަދެކެވެ. އެގޮތުން 21 ފަރާތަކުން ސްޓޯލްތަކުގައި ތަކެތި ވިއްކުމަށް ހަމަޖެހިފައިވެއެވެ.
ބޮޑުތިލަދުންމަތީ ބޮޑުބާޒާރު ކުރިއަށްދަނީ އައިލެންޑް ކާނިވަލްގެ ފޯރިގަދަ، މަޖާ، ކުޑަކުދިންނާއި ބޮޑެތި މީހުންނަށް ވެސް ބައިވެރިވެވޭ ގޮތަށް ފަރުމާކުރެވިފައިވާ ގިނަ ގޭމްތަކަކާއި އެކުގައެވެ. އޭގެ ތެރޭގައި ބައުންސް ޒޯން، ލޭޒަރ ޓެގް، ވައިޕްއައުޓް، ބުލް ބޭޝް، ހަރިކޭން، ގްލޭޑިއޭޓަރ ޑިއުލް، ސްޓިކް މެޝިން، ޝޫޓް ޔުއަރ ޝޮޓް، ވީޑިއޯ ބޫތު، ފޮޓޯ ބޫތު، ވްރެކިންގ ބޯލް، އެކްސް ތްރޯވިންގ، ހިއުމަން ފޫސްބޯލް، ބަބުލް ހައުސް، ނަރފް ޝޫޓް އަދި ހޮރޯރ ހައުސް (ބިރުވެރި ހޮހޮޅަ) ހިމެނެއެވެ.
އަދި 01 އަހަރާއި 16 އަހަރާއި ދެމެދުގެ ކުޑަކުދިންނަށް އަމާޒުކޮށްގެން "ކިޑްސް ޓެލެންޓް ޝޯ"، ތަފާތު އެކި އިނާމުތަކާއެކު 02 އޮކްޓޯބަރ 2026 (ހުކުރު) އަދި 03 އޮކްޓޯބަރ 2026 (ހޮނިހިރު) ދެ ދުވަހު ކުރިއަށް ދާނެކަމަށް ސިޓީ ކައުންސިލުން މައުލޫމާތުދެ އެވެ. މީގެ އިތުރުން، ސްޓޭޖް-ޝޯގެ ހުށަހެޅުންތައް ވެސް ކުރިއަށް ދާނެއެވެ. މި ބާޒާރުގައި މުނިފޫހިފިލުމަށް 6 މިއުޒިކް ބޭންޑެއްގެ ހުށަހެޅުންތައް ފެނިގެންދާނެ އެވެ.
އެގޮތުން މުނިފޫހިފިލުވުމުގެ ހަރަކާތްތަކުގެ ތެރޭގައި ބޮޑުބެރާއި މިއުޒިކް ބޭންޑްގެ ހުށަހެޅުންތައްވެސް ފެނިގެންދާނެ އެވެ. މީގެ އިތުރުން ބިރުވެރި ހޮހޮޅަ ތަޖުރިބާކުރުމުގެ ފުރުސަތުވެސް ލިބިގެންދާނެ އެވެ.
