ބޮޑު ތިލަދުންމަތީ ބޮޑު ބާޒާރުގައި އެސްއެމްއީ ޑިޖިޓަލްގެ ސްޓޯލެއް

ކުޅުދުއްފުށީގައި މިއަދު ފަށައި ބޮޑު ތިލަދުންމަތި ބޮޑު ބާޒާރުގައި ކުދި އަދި މެދުފަންތީގެ ވިޔަފާރިތަކަށް ހާއްސަ އެސްއެމްއީ ޑިޖިޓަލް އިން ބައިވެރިވެއްޖެ އެވެ.

ކުޅުދުއްފުށި ސިޓީ ކައުންސިލުން އިންތިޒާމުކުރާ މި ބޮޑު ބާޒާރު އޮންނާނީ ސެޕްޓެމްބަރު 30 އިން އޮކްޓޫބަރު މަހުގެ 4 ވަނަ ދުވަހުގެ ނިޔަލަށް ވެލިގަނޑު ސަރަހައްދުގަ އެވެ.

މި ބާޒާރު ކުރިއަށްދާނީ ބޮޑު ކާނިވަލަކާއެކު ތަފާތު ގޭމްތަކާއި ބިރުވެރި ހޮހޮޅަ އާއި މުނިފޫހިފިލުވުމުގެ ގިނަ ހަރަކާތްތަކާއެކު އެވެ.

މި ކާނިވަލުގެ މަގުސަދަކީ ހއ.ހދ. އަށި ށ އަތޮޅުގެ ކުދި ވިޔަފާރިތައް ހާއްސަކޮށް އެމީހުންގެ އުފެއްދުންތައް މާކެޓްކުރުމުގެ ފުރުސަތު ހުޅުވާލުމާ އެކު އިޖްތިމާއީ ގުޅުން ބަދަހި ކުރުމަށް އާއިލީ ހަވީރާއި، ތަފާތު އެކި ކަހަލަ ކާނިވަލް ގޭމްތައް ކުޅުމުގެ މަގު ފަހިކޮށްދިނުމެވެ.

މި ކާނިވަލުގައި އެސްއެމްއީ ޑިޖިޓަލް އިން ހަރަކާތްތެރިވާނީ، ކުދި އަދި މެދުފަންތީގެ ވިޔަފާރިތައް ތަރައްގީކޮށް އަދި ގޭބިސީގައި އަންހެނުން، ޒުވާނުން އަދި މީގެ އިތުރުން ރާއްޖޭގެ އިގްތިސާދުގައި މުހިއްމު ދާއިރާތައް ކަމުގައިވާ މަސްވެރިކަމާއި. ޓުއަރިޒަމް، ދަނޑުވެރިކަން ފަދަ ދާއިރާތަކަށް އެސްއެމްއީ ޑިޖިޓަލް އިން ފޯރުކޮށްދޭ ފައިނޭންސިންގ އާ ގުޅޭ މައުލޫމާތުފޯރުކޯށްދީ ހޭލުންތެރި ކުރުމަށެވެ.

އަދި އެސްއެމްއީ ޑިޖިޓަލްގެ ހިދުމަތްތަކަށް އެޕްލިކޭޝަން ހުށެހެޅުމަށް ބޭނުންވާ ފަރާތްތަކަށް ބޭނުންވާ ލިޔެކިޔުންތައް ތައްޔާރުކުރުމުގައި އެހީތެރިކަން ފޯރުކޮށްދިނުމަށް އެސްއެމްއީ ޑިޖިޓަލްގެ މުވައްޒަފުން ހަމަ މި މުއްދަތުގައި ކުޅުދުއްފުށީ ސިޓީގައި ހަރަކާތްތެރިވާނެ ކަމަށް އެފަރާތުން މައުލޫމާތުދެ އެވެ.

މީގެ އިތުރުން އެސްއެމްއީ ޑިޖިޓަލް އިން ދޫކޮށްފައިވާ ކޮންވެންޝަނަލް ލޯނުތައް އިސްލާމިކް ފެސިލިޓީތަކަށް ބަދަލުކުރުމަށް، ހއ، ހދ، އަދި ށ މި ސަރަހައްދުގެ ކަސްޓަމަރުންނަށް އެހީތެރިކަން ފޯރުކޮށްދިނުމަށް މުވައްޒަފުން ހަރަކާތްތެރިވާނެއެވެ.

އެސްއެމްއީ ޑިޖިޓަލް އަކީ އެޑްވެންޗަރ އަޕް އިން ބާއްވާ މި ކާނިވަލުގެ އެއް ސްޕޮންސަރުވެސްމެއެވެ. އައިލެންޑް ކާނިވަލަކީ މުޖުތަމަޢުގެ ގުޅުން ބަދަހިކޮށްދީ، ކުޑަކުދިންނަށް އުފާވެރި މާހައުލެއް ހޯދައިދިނުމުގެ އިތުރުން ކުދި ވިޔަފާރިތަކަށް މާކެޓް ފުރުސަތުތައް ފަހިކޮށްދޭ ހަރަކާތަކަށްވާތީ، އެސްއެމްއީ ޑިޖިޓަލް އިން މިފަދަ ހަރަކާތްތަކުގައި މުހިންމު ދައުރެއް އަދާކުރަނީ މުޖުތަމައަށް އަނބުރާ ދިނުމުގެ ބޭނުމުގައިއެވެ.