ހިޖުރަކުރާ ދޫނިތައް ހިފާނަމަ ފިޔަވަޅު އަޅާނެކަމުގެ އިންޒާރު އީއާރްއޭއިން ދީފި

އިރުވައި މޫސުމާ ދިމާކޮށް ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފައި، ގެންގުޅެ އަދި ވިޔަފާރިކުރާ ފަރާތްތައް ޖޫރިމަނާކުރާނެ ކަމުގެ އިންޒާރު، އެންވަޔަރަމަންޓަލް ރެގިއުލޭޓަރީ އޮތޯރިޓީ (އީއާރުއޭ) އިން ދީފިއެވެ.

އިރުވައި މޫސުމުގައި ދުނިޔޭގެ އެކި ހިސާބުތަކުން ގިނަ ބާވަތްތަކުގެ މޫސުމީ ދޫނި ރާއްޖެއަށް ހިޖުރަކުރާއިރު މިގޮތަށް ހިޖުރަކުރާ ދޫންޏަކީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ހިމާޔަތްކުރެވިފައިވާ ދިރުންތަކެކެވެ.

މިފަދަ ދޫނި ހިފާ އެތަކެތި ގެންގުޅުމަކީ މި ގަވާއިދުގެ 17 ވަނަ މާއްދާގެ ދަށުން މަނާކަމެކެވެ.

އީއާރްއޭ އިން ބުނީ ރާއްޖެއިން ފެންނަ ގިނަ ބާވަތްތަކުގެ ދޫންޏަކީ މިގޮތަށް މޫސުމާ ގުޅިގެން ރާއްޖެއަށް ހިޖުރަކުރާ ބާވަތްތައް ކަމުގައިވާއިރު، މިފަދަ ދިރުންތައް ރައްކާތެރިކުރުމަކީ ރާއްޖޭގެ ދޫނިސޫފާސޫފީގެ ސިންދަފާތާއި ވެށީގެ މުއްސަނދިކަން ރައްކާތެރި ކުރުމަށް އެޅިގެންދާ މުހިއްމު ފިޔަވަޅެއް ކަމަށެވެ.

ހިޖުރަކުރާ ދޫނި ހިފާ، ގެންގުޅުމުގެ އިތުރުން މިފަދަ ދޫނީިގެ ވިޔަފާރި ބައެއް މީހުން ކުރާކަން ފާހަގަކޮށް އީއާރްއޭ އިން ބުނީ މި ފަދަ އަމަލުތަކަކީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއްކަމުގައިވާ ކޮންވެންޝަން އޮން މައިގްރޭޓަރީ ސްޕީޝީޒް އާ ހިލާފު އަމަލުތަކެއް ކަމަށާއި މި މުއާހަދާގެ ދަށުން މިފަދަ ހިޖުރަކުރާ ދޫނިތަކަށް ރައްކާތެރިކަން ފޯރުކޮށްދިނުމަކީ ރާއްޖޭގެ ޒިންމާއެއް ކަމަށެވެ.

މީގެ އިތުރުން މި ފަދަ އަމަލުތަކަކީ ރާއްޖެއަށް ހިޖުރަކުރާ ދޫނިގެ ސަބަބުން ރާއްޖޭގެ ވެއްޓަށް ކުރާ ފައިދާތަކާއި މުއްސަނދި ކަމަށް އެޅޭ ހުރަހެއްކަން ފާހަގަކޮށް އީއާރްއޭ އިން ބުނީ މިދިޔަ އަހަރު އެ އޮތޯރިޓީން ކުރި ދިރާސާއަކުން ރާއްޖެއަށް ހިޖުރަކުރާ ދޫނީގެ އަދަދު މަދުވަމުންދާކަން ފާހަގަކުރެވިފައިވާ ކަމަށެވެ.

ދޫނި ހިފައި ގެންގުޅޭ ފަރާތްތަކުގެ މައުލޫމާތު އެނގޭނަމަ، އެކަން އީއާރުއޭއަށް ރިޕޯޓުކުރުމަށް އެ އޮތޯރިޓީން ވަނީ އާންމުންގެ ކިބައިން އެދިފައެވެ. ޝަކުވާ ހުށަހަޅާއިރު، ދޫނި ގެންގުޅޭ ފަރާތުގެ މައުލޫމާތާއި، އެތަކެތި ގެންގުޅޭ ތަނުގެ ތަފުސީލާއި، ހިފާފައިވާ ދޫނީގެ ބާވަތުގެ އިތުރުން މައްސަލައާ ގުޅުންހުރި ފޮޓޯ ނުވަތަ ވީޑިއޯ ހުށަހެޅުމަށް އީއާރުއޭއިން އެދެއެވެ. މި މައުލޫމާތުތައް އެ އޮތޯރިޓީގެ ނަންބަރު 3335949 އަށް ގުޅައިގެން ނުވަތަ އީމެއިލް މެދުވެރިކޮށް ހިއްސާކުރެވޭނެއެވެ.ވެ އެވެ.