ހޮނޑާފުށި ރިސޯޓްގެ ކަންކަން ކަމަކުނުދޭ، އެތަނުގެ ހާލަތު ބަލައިދީ: ޔާސިރު

ހދ އަތޮޅުގައި އޮންނަ ހަމައެކަނި ރިސޯޓް ހޮނޑާފުށީގެ ހާލަތު ދަށްވުމުން އެކަންތައްތައް ބަލައިދިނުމަށް ޓޫރިޒަމް މިނިސްޓަރު އަލީ ވަހީދުގެ އަރިހުން، ކުޅުދުއްފުށީ ދެކުނު ދާއިރާގެ މެމްބަރު ޔާސިރު އަބުދުއްލަތީފް އެދިވަޑައިގަންނަވައިފި އެވެ.

ބިލެތްދޫ ދާއިރާގެ ކުރީގެ މެމްބަރު ހަމްޒާގެ މަސްލަހަތު އޮންނަ ތްރީއޭ ކުންފުނިން ހިންގާ މި ރިސޯޓްގައި ސާވިސް ޗާޖާއި ދިވެހިން މުވައްޒަފުންގެ ކެއުން ވަރަށް ދަށް ކަމަށް ޔާސިރު ވިދާޅުވި އެވެ.

އެ ރިސޯޓްގެ ހާލަތު ދަށްވުމުން އެކަމާ ކަންބޮޑުވެވަޑައިގެން ޔާސިރު އިއްޔެ ކުރެއްވި ޓްވީޓެއް ވިދާޅުވެފައިވަނީ މިދިޔަ މަހު ސާވިސް ޗާޖުގެ ގޮތުގައި މުވައްޒަފުންނަށް ދީފައިވަނީ އެންމެ 63 ޑޮލަރު ކަމަށެވެ. އަދި އާއްމު މުސާރައިގެ ގޮތުން ދެނީ 5000ރ ކަމަށްވެސް ވިދާޅުވެފައިވެ އެވެ.

80 ކޮޓަރިއާއެކު އޮޕަރޭޝަންތައް ފެށި މި ރިސޯޓް ހުޅުވީ 2018 ވަނަ އަހަރު މާރޗުމަހުގެ ތެރޭގައި އެވެ. 2018 ވަނަ އަހަރު ކޭއޯއިން ކުރި ސުވާލަކަށް ޖަވާބު ދެއްވަމުން ހޮނޑާފުށީގެ ވެރިޔާ ހަމްޒާ ވިދާޅުވެފައިވަނީ 80 ކޮޓަރީއާއެކު ހުޅުވިނަމަވެސް އެއްކޮށް ރިސޯޓްގެ މަސައްކަތް ނިމޭއިރު 400 ކޮޓަރި ހިމެނޭނެ ކަމަށެވެ. އަދި ކޮޓަރި އެޅުމުގެ މަސައްކަތް ކުރާނީ އަހަރުތަކަށް ބަހާލައިގެން ކޮންމެ އަހަރަކުވެސް 100 ކޮޓަރި އަޅައިގެންކަމަށް ހަމްޒާ ވިދާޅުވެފައިވެ އެވެ.

2/2 Hondaafushi, where number of Maldivian staff is not more than 20/200 staff. Last month SC is only $63, average salary is below RF 5000, only 62 room and didn’t develop any rooms this year but supposed to develop 100 rooms every year till 400. Food for Maldivian’s is so poor

— Yasir Abdul Latheef (@YasirLathyf) December 25, 2019

އެކަމަކު ޔާސިރު ވިދާޅުވީ، 400 ކޮޓަރި ތަރައްގީކުރާ ގޮތަށް އަހަރަކު 100 ކޮޓަރި އަޅަން ވިދާޅުވެފައިވީނަމަވެސް މިއަހަރު އެއްވެސް ކޮޓަރިއެއް އަލަށް އަޅާފައިނުވާ ކަމަށެވެ. އަދި މިހާރު އެ ރިސޯޓްގައި ހުރީ 62 ކޮޓަރިކަމަށް ޔާސިރު ވިދާޅުވި އެވެ. އަދި އެރަށުގައި 200 މުވައްޒަފުން އުޅޭއިރު ދިވެހިންގެ އަދަދަކީ 20 ކަމަށްވެސް އޭނާ ވިދާޅުވެފައިވެ އެވެ.

ޓޫރިޒަމް މިނިސްޓަރު އަލީ ވަހީދު ޓެގް ކުރައްވައި ޔާސިރު ކުރެއްވި އިތުރު ޓްވީޓެއްގައި ވިދާޅުވެފައިވަނީ ފަތުރުވެރިކަމުގެ ދާއިރާ ކުރިއަރުވަން ކުރާ މަސައްކަތަކަށް ތައުރީފުކުރައްވާ ކަމަށާ ހދ އަތޮޅުގައި އޮތް ހަމައެކަނި ރިސޯޓްގެ ހާލަތު މިނިސްޓަރު ބައްލަވާދެއްވުމަށެވެ.

1/2 With all due respect Minister @ali20waheed, I appreciate what you are doing to improve tourism sector and have achieved so much, yes there are resorts who give reasonable amount for service charge, But can you please check the status of only resort we have in Haa Dhaal

— Yasir Abdul Latheef (@YasirLathyf) December 25, 2019

ހދ. ހޮނޑާފުއްޓަކީ 56.03 ހެކްޓަރުގެ ބޮޑުރަށެކެވެ. ރީތި ބޮޑުފަޅަކާއި, ނަލަ ގޮނޑުދޮށެއް ލިބިފައިވާ މިރަށުގެ ދެކޮޅުގައި ދެ ތުނޑި އޮންނައިރު, އެއާޕޯޓް އޮންނަ ހަނިމާދޫއާ ދާދި ކައިރީގައިވާ ހޮނޑާފުށި ފާހަގަކޮށްލެވެނީ ހދ. އަތޮޅުގައި އޮތް ރީތި ރަށެއްގެ ގޮތުގަ އެވެ. ތްރީ އޭ ކޮންޕެނީ ތަރައްގީކުރާ މިރަށުގެ އިމާރާތް ކުރުމުގެ ހުއްދަ ސަރުކާރުން ދީފައިވަނީ 12 ފެބްރުއަރީ 2006 ގައެވެ