ކައުންސިލްތަކުން ވިޔަފާރި ފީ ބަލައިގަތުން ހުއްޓާލައިފި

ކައުންސިލްތަކަށް މީގެ ކުރިން ދައްކަމުން ދިޔަ ވިޔަފާރި ފީ ކައުންސިލް ތަކުން ބަލައިގަތުން ހުއްޓާލައިފި އެވެ.

މިނިސްޓްރީ އޮފް އިކޮނޮމިކް ޑިވޮލޮޕްމަންޓުން މިކަމާ ބެހޭގޮތުން އިއްޔެ ކުރި އިއުލާނުގައި ބުނެފައިވާ ގޮތުން ވިޔަފާރި ރަޖިސްޓްރީކުރުމުގެ ގާނޫނަށް އިސްލާހު ގެނައުމުގެ ގާނޫނަށް މި މަހު 4 ވަނަ ދުވަހުން އަމަލުކުރަން ފެށުމާއެކު އިމްޕޯޓް މުދަލުގެ ވިޔަފާރިކުރުމުގެ ހުއްދަ، ސައިހޮޓާ ރެސްޓޯރެންޓް ހިންގުމުގެ ހުއްދައިގެ އިތުރުން ކެންޓީން ހިންގުމުގެ ހުއްދަ ދޫކުރުން ހުއްޓާލާފައިވާ ކަމަށެވެ.

އެހެންކަމުން އެ ހުއްދަތަކާގުޅޭ މަހު ފީ ބަލައިގަތުން މިނިސްޓްރީ އޮފް އިކޮނޮމިކް ޑިވޮލޮޕްމަންޓުންނާއި ސިޓީ ކައުންސިލްތަކުންނާއި ރަށު ކައުންސިލްތަކުންނާއި މޯލްޑިވްސް އިންލެންޑް ރެވެނިއު އޮތޯރިޓީން ހުއްޓާލާފައިވާ ކަމަށެވެ.

މިއިން ވިޔަފާރިއެއް ކުރަން ބޭނުންވާ ފަރާތްތަކުން 18/2014 ވިޔަފާރި ރަޖިސްޓަރީކުރުމުގެ ގާނުންގެ ދަށުން އަމިއްލަ ފަރުދުންގެ ވިޔަފާރިއެއް، ކުންފުންޏެއް، ޕާރޓްނާރޝިޕެއް ނުވަތަ ކޯޕަރޭޓިވް ސޮސައިޓީއެއް ރަޖިސްޓްރީ ކުރުމަށްފަހު މިނިސްޓްރީ އޮފް އިކޮނޮމިކް ޑިވޮލޮޕްމަންޓުން އިތުރު ހުއްދައެއް ނުހޯދައި ވިޔަފާރި ފެށޭނެ ކަމަށެވެ.