ކޮރޯނާވައިރަހަށް ޝައްކުވާ މީހުން އާރަށުގައި ކަރަންޓީނު ކުރަނީ

ރައީސުލް ޖުމްހޫރިއްޔާއަށް ހާއްސަކޮށްފައިވާ ކ. އާރަށް، ކޮރޯނާވައިރަހަށް ޝައްކުވާ މީހުން ކަރަންޓީނުކުރާ ތަނެއްގެ ގޮތުގައި ބޭނުންކުރަން ސަރުކާރުން ކަނޑައަޅައިފި އެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ، އާރަށް ކަރަންޓީނު ފެސިލިޓީއެއްގެ ގޮތުގައި ބޭނުންކުރަން ހުށަހެޅުއްވީ ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހް ކަމަށެވެ.

ކޮރޯނާ ވައިރަސްގެ ނުރައްކާ ބޮޑުވުމާއެކު ކަރަންޓީ ފެސިލިޓީތައް ވަނީ ސަރުކާރުން ހަދާފަ އެވެ. އެގޮތުން ކ.ފުނަދޫ އާއި ފަރުކޮޅުފުށިވެސް ވަނީ މީހުން ކަރަންޓީކުރެވޭ ގޮތަށް ހަމަޖައްސާފަ އެވެ.

މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފޮރިން މިނިސްޓަރު އަބުދުﷲ ޝާހިދު ވިދާޅުވީ، ވޫހާންގައި ތިބި 7 ދިވެހިން މިހާރު އިންޑިޔާއަށް ގެނެސްފައިވާ ކަމަށާއި އެ މީހުން ކަރަންޓީނު ކުރުމަށް ހަމަޖެހިފައިވަނީ ދިއްލީގައި ކަމަށެވެ.