ކުދި ވިޔަފާރިތަކަށް ކުރިއަރުވަން 20 މިލިއަން ރުފިޔާގެ ފަންޑެއް

ކުދި އަދި މެދުފަންތީގެ ވިޔަފާރިތަކަށް ހާއްސަކޮށް މޯލްޑިވްސް މެނޭޖްމެންޓް ކޯޕަރޭޝުން 20 މިލިއަން ރުފިޔާގެ ފަންޑެއް އިފުތިތާހުކޮށްފި އެވެ.

"އެސްއެމްއީ އިނޮވޭޝަން ފަންޑް"ގެ ނަމުގައި ކުރިއަށްގެންދާ މިފަންޑު އިފުތިތާހުކޮށްދެއްވީ ހޮޓެލް ޖެންގައި ރޭ ބޭއްވި ރަސްމިއްޔާތެއްގައި އިކޮނޮމިކް މިނިސްޓަރު ފައްޔާޒު އިސްމާއިލެވެ.

މި ފަންޑު ބޭނުންކޮށްގެން، ކުދި އަދި މެދުފަންތީގެ ވިޔަފާރިތަކުގެ ތެރެއިން އީޖާދީ ވިޔަފާރިތައް ފެށުމަށާއި ކުރިއެރުވުމުގެ ގޮތުން ބޭނުންވާ ކެޕިޓަލް ހަމަޖެހޭނެ އެވެ. އަދި މުދާ ރަހުނު ކޮށްގެން ބޭންކު ލޯނު ލިބުމުގައި ދަތިވާ ވިޔަފާރިތަކަށް ވެސް މި ފަންޑުން ހައްލު ލިބޭނެ އެވެ.

މި ފަންޑުގެ އެހީގައި ވިޔަފާރިތަކަށް ބޭނުންވާ ތަމްރީނާއި ބިޒްނަސް އިންކިއުބޭޓާ މެދުވެރިކޮށް ހުރި ފުރުސަތުތައް ތަނަވަސް ކޮށްދޭނެ އެވެ. މިއީި ރާއްޖޭގެ އިގްތިސާދު ކުރިއެރުވުމަށް މުހިންމު ފިޔަވަޅެއް ކަމަށް އިކޮނޮމިކް މިނިސްޓްރީން ބުނެ އެވެ.

ކުދި އަދި މެދުފަންތީގެ ވިޔަފާރި ކުރިއަރުވަން މި ފަހަރު ތައާރަފު ކުރީ 20 މިލިއަން ރުފިޔާގެ ފަންޑަކަށް ވިޔަސް، އަމިއްލަ ވިޔަފާރިތަކުގެ އެހީއާ އެކު، ކުރިމަގުގައި މި ފަންޑު އިތުރުވާނެ ކަމަށް އިކޮނޮމިކް މިނިސްޓްރީން މައުލޫމާތުދެ އެވެ.