ބަލިމީހުންނަށް ޒިޔާރަތްކުރުން އައިޖީއެމްއެޗުން ވަގުތީ ގޮތުން މެދުކަނޑާލައިފި

އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި އެޑްމިޓްކޮށްފައި ތިބޭ ބަލި މީހުންނަށް ޒިޔާރަތް ކުރުމުގެ ފުރުސަތު ވަގުތީ ގޮތުން މިއަދުންފެށިގެން ވަނީ ހުއްޓާލާފަ އެވެ.

އެ ހޮސްޕިޓަލުން މިއަދު ނެރުނު ނޫސްބަޔާނުގައި ބުނެފައިވަނީ ކޮވިޑް-19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން އެޑްމިޓްކޮށްގެން ފަރުވާދޭ ބަލި މީހުންނަށް ޒިޔާރަތްކުރުމުގެ ވަގުތު މެދުކަނޑާލާފައިވާ ކަމަށެވެ. އެއީ އެންމެންގެ ރައްކާތެރިކަމަށްޓަކައި ނިންމި ނިންމުމެއް ކަމަށާއި ނަމަވެސް ފާސް ލިބިފައިވާ އެހީތެރިޔާ އަށް ބަލި މީހައާއެކު މަޑުކުރެވޭނެ ކަމަށެވެ.

އެ ބަޔާނުގައި އިތުރަށް ބުނެފައިވަނީ ފާސް ލިބިފައިވާ މީހުންގެ އިތުރުން އެހެން މީހުން ހޮސްޕިޓަލަށް ޒިޔާރަތްކުރުމާއި މިނޫން އެހެން ކަންކަމުގައި ވެސް ކޮންމެހެން ހޮސްޕިޓަލަށް ދާން ޖެހިގެން ނޫނީ ނުދިއުމަށް އިލްތިމާސްކުރާ ކަމަށެވެ.

ޗައިނާގައި އުފަންވެ ދުުނިޔޭގެ އެކި ހިސާބުތަކުގައި ހަލުވިކަމާއި އެކު ފެތުރެން ފެށި ވައިރަހުގެ އަސަރު ރާއްޖެއިން ވެސް ވަނީ ފެނިފަ އެވެ.