ސްޓޫޑަންޓް ލޯނު ދެއްކުން ހަ މަހަށް ފަސްކޮށްފި

ކޮވިޑް-19 އާ ގުޅިގެން، ރައްޔިތުންނަށް ދިމާވާ މާލީ ދަތިތަކަށް ލުޔެއް ހޯދައި ދިނުމުގެ ގޮތުން، މިހާރު ކިޔަވާ ކުދިންނަށް ދޫކޮށްފައިވާ ލޯނުތައް އަނބުރާ ދެއްކުން ހަ މަސް ދުވަހަށް ފަސްކުރެވިފައިވާކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ކޮވިޑް19 އާ ގުޅިގެން ސަރުކާރުން އަޅަމުންދާ ފިޔަވަޅުތައް މައުލޫމާތު ނޫސްވެރިންނަށް ހިއްސާކުރައްވަމުން ރައީސް ސޯލިހު ވިދާޅުވި ރާއްޖޭގެ އިގުތިސޯދަށް އަންނަ ހީނަރުކަމުން އަރައިގަތުމަށް ސަރުކާރުން އިއުލާނުކޮށްފައިވާ 2.5 ބިލިއަން ރުފިޔާގެ ޕެކޭޖުގެ ދަށުން ވަރަށް ބޮޑު އެހީތެރިކަމެއް ލިބިގެންދާނެ ކަމަށެވެ.

އެގޮތުން، ކުދި އަދި މެދު ފަންތީގެ ވިޔަފާރިތަކަށް ދޫކުރާ ލުއި ލޯނުތަކާއި، މަސް ގަންނަ ކުންފުނިތަކަށް ދޭ ލޯނުތަކުގެ އިތުރުން، ކޮވިޑް-19 އާ ގުޅިގެން ވަޒީފާ ގެއްލޭ ފަރާތްތަކަށް އެލަވަންސްދޭން ހަމަޖެހިފައިވާކަން ރައީސް ސޯލިހު ފާހަގަކުރެއްވި އެވެ.

އަދި މަތީ ތައުލީމު ހާސިލުކުރަމުންދާ ދަރިވަރުންގެ ތެރެއިން 4،000 އެއްހާ ކުދީންނަކީ ލޯނު ނަގައިގެން ކިޔަވަމުންދާ ކުދީންކަން ފާހަގަކުރައްވަމުން، ރައީސް ސޯލިހު ވިދާޅުވީ މި ހާލަތާ ގުޅިގެން ސްޓޫޑަންޓް ލޯނުތައް ދެއްކުން ހަ މަސް ދުވަހަށް ފަސްކޮށްދިނުމަށް ނިންމާފައިވާ ކަމަށެވެ.

އެ މަނިކުފާނު ވިދާޅުވި ގޮތުގައި، އިކޮނޮމިކް ސްޓިމިޔުލަސް ޕެކޭޖުގެ ދަށުން ދޫކުރަން ހަމަޖެހިފައިވާ ލޯނުތަކަށް އެދުމުގެ ފުރުސަތު އަންނަ ހަފްތާގެ ތެރޭގައި ހުޅުވިގެންދާނެ ކަމަށެވެ.