ރާއްޖެ އިން ނުލިބޭ ބޭސްތައް އެސްޓީއޯ އިން ގެނެސްދެނީ

ދާއިމީ ބަލިތަކަށް ބޭސް ބޭނުންކުރާ ފަރާތްތަކުގެ ބޭސް ރާއްޖެ އިން ލިބެން ނެތް ނަމަ އެ ބޭސް އެސްޓީއޯގެ ހެންވޭރު ފާމަސީން ގެނެސްދޭނެ ކަމަށް ސަރުކާރުން ބުނެފި އެވެ.

ރޭ ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ އަންޑާ ސެކްރެޓަރީ މުހައްމަދު މަބްރޫކް އަޒީޒް ވިދާޅުވީ ދާއިމީ ބަލިތަކަށް ބޭސްކުރާ މީހުންގެ ބޭސް ރާއްޖެ އިން ލިބެން ނެތް ނަމަ އެ ބޭސް އެސްޓީއޯ އިން ރާއްޖެ ގެނައިސް ދޭނެ ކަމަށެވެ.

އާސަންދަ ނުވަތަ އެންސްޕާގެ އެހީގައި ހޯދާ ބޭހެއް ނަމަ އެ ތަނުގެ ކޯޓޭޝަން އާއި ލިޔެކިޔުންތައް އެސްޓީއޯގެ ހެންވޭރު ފާމަސީއަށް ހުށަހެޅުމަށް މަބްރޫކް ވަނީ އެދިފަ އެވެ.

އިންޑިއާ ލޮކްޑައުންކުރުމުގެ ސަބަބުން ރާއްޖެ އިން އޯޑަރުކޮށް ނުގެނެވި ހުރި 6.2 ޓަނުގެ ބޭސް އެ ގައުމުގެ އަސްކަރީ މަތިންދާބޯޓެއްގައި މިހާރުވަނީ ގެނެސްފަ އެވެ. އަދި އެ ގައުމުން ދާދި ފަހުން ވަނީ ރާއްޖެއަށް ބޭނުންވާ ބޭސްތަކުގެ ތެރެއިން ތިންމަހަށް ބޭނުންވާ ޒަރޫރީ ބޭސްތައްވެސް ހަދިޔާކޮށްފަ އެވެ.