ފިޔާ، އަލުވި އަދި ބިހުގެ އިތުރު ޝިޕްމަންޓެއް ރާއްޖެ ގެނެސްފި

ރާއްޖެއަށް ފިޔާ، އަލުވި، އަދި ބިހުގެ އިތުރު ޝިޕްމެންޓެއް އެސްޓީއޯ އިން ގެނެސްފި އެވެ.

ކޮވިޑް-19 ގެ ސަބަބުން ކާބޯތަކެތީގެ ދަތިކަމެއް އަޔަނުދިނުމަށް އެސްޓީއޯއިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެސްޓީއޯއިން ފިޔާ، ބިސް އަދި އަލުވި ގެނެސްފައިމިވަނީ އިންޑިއާއިންނެވެ. އަދި މިމަހުގެ 12 ވަނަ ދުވަހު އިތުރު ޝިޕްމަންޓެއް ރާއްޖެއަށް އަންނާނެކަމަށްވެސް އެކުންފުނިން މައުލޫމާތުދެއެވެ.

މި ދަނޑިވަޅުގައި ރާއްޖޭގެ ބާޒާރުގައި ކާބޯތަކެތި އުފުލެމުން ދަނިކޮށް އެސްޓީއޯއިންވަނީ އަގު ކޮންޓްރޯލްކޮށް ހުރިހާ ރައްޔިތުންނަށްވެސް ހިދުމަތްދިނުމަށް ފިޔާ ބިސް އަދި އަލުވި ވިއްކަމުންނެވެ. އެގޮތުން ކޮންމެ މީހަކަށް އެއްކިލޯ ފިޔާ، އެއްކިލޯ އަލުވި އަދި އެއް ޓްރޭ ބިހުގެ ރޭޓުން މުދާ ވިއްކުމަށް އެކުންފުނިން ވަނީ ނިންމާފައެވެ.

އެސްޓީއޯއިން ބިސް ވިއްކަނީ 1.50 ރުފިޔާއަށެވެ. ފިޔާ އަދި އަލުވި ވިއްކަނީ 12 ރުފިޔާއަށް ކިލޯއެކެވެ.

މި ދަނޑިވަޅުގައި ކާބޯތަކެތި އަގުބޮޑުކޮށްވިކާ ފަރާތް ތަކާއި މެދު ފިޔަވަޅު އަޅައި ޖޫރިމަނާ ކުރާނެ ކަމަށްވެސް ސަރުކާރުންވަނީ ބުނެފަ އެވެ.