750 ރުފިޔާއަށް ވުރެ ކުޑަ އޯޑަރު ތަކަށް އެންޒީން 20 ރުފިޔާގެ ޑެލިވަރީ ފީއެއް ނަގަނީ

އެންޒީގެ ޑެލިވަރީތަކުގެ ބިލު 750 ރުފިޔާއަށް ވުރެ ކުޑަވާނަމަ، ޑެލިވަރީ ފީގެ ގޮތުގައި 20 ރުފިޔާ ނަގަން ފަށާފައިވާ ކަމަށް އެ ކުންފުނިން ބުނެފިއެވެ.

އެންޒީން ބުނީ، ވަރަށް ގިނަ އަދަދެއްގެ އޯޑަރުތަކެއް ލިބިފައިވާ ކަމަށާއި، ކަސްތަމަރުންނަށް އަވަހަށް އޯޑަރުތައް ޑެލިވަރީ ކުރަން އިއްޔެއިން ފެށިގެން އިތުރު ފަރާތްތަކާއި ގުޅިގެން، މަސައްކަތް ފަށާފައިވާ ކަމަށެވެ.

މި ބަދަލާއެކު އިއްޔެއިން ފެށިގެން ޑެލިވަރީ ކުރާ ފަރާތްތަކުގެ ބިލުގެ ޖުމްލަ 750 ރުފިޔާއަށް އަށްވުރެ ކުޑަވެއްޖެނަމަ، ޑެލިވަރީ ފީ އެއްގެ ގޮތުގައި 20 ރުފިޔާ ނަގަން ފަށާފައިިވާކަމަށް އެންޒީން ބުންޏެވެ.

މި މަހުގެ 15 ވަނަ ދުވަހު މާލެ ސަރަހައްދު ލޮކްޑައުން ކުރުމާ އެކު އެންޒީން ވިއްކާތަކެތި ވަނީ ގޭގެއަށް ޑެލިވަރީ ކުރުމުގެ މަސައްކަތް ފަށައިފައެވެ.

އެގޮތުން އެދުވަހުން ފެށިގެން ލިބިފައިވާ ހުރިހާ އޯޑަރުތަކެއް ވެސް ވީއެންމެ އަވަހަކަށް ޑެލިވަރީކޮށްދިނުމަށް، މާލެ އަދި ހުޅުމާލޭގައި ކޮންމެ ދުވަހަކު ހެނދުނު 08:00 ން 23:00 އަށް އެންޒީގެ ޑެލިވަރީ ޓީމުތައް ވަރަށް ބުރަކޮށް މަސައްކަތް ކުރަމުން އަންނަ ކަމަށް އެންޒީން ބުނެއެވެ.

ނަމަވެސް ވަރަށް ބައިވަރު އޯޑަރު ލިބިފައިވުމާއިއެކު ޑެލިވަރީ ކުރުމުގަައި ދަތިތަކެއް ކުރިމަތިވެފައިވާތީ ޑެލިވަރީ ކުރުމުގެ ހިދުމަތް ފުޅާކޮށް އިތުރު ފަރާތްތަކެއްގެ އެހީތެރިކަމާއިއެކު ޑެލިވާރީ ކުރަން މިހާރު ވަނީ ފަށައިފަައެވެ.

އޯޑަރު ދޭއިރު އޯޑަރު ކުރާ މީހާގެ ނަމާއި، އެޑްރެސް، އެޕާޓްމަންޓް ނަންބަރު، ގުޅޭނެ ނަންބަރު އަދި ބޭނުންވާ ތަކެތީގެ އަދަދު ޖެހުމަށްފަހު މާލެއިންނަމަ 7428899 އަދި ހުޅުމާލެއިން ނަމަ 7528899 އަށް ވައިބާ ކުރާނީއެވެ.

އެންޒީން ބުނީ އޯޑަރު ތައްޔާރުވުމުން ބިލުގެ ޖުމްލަ އަދަދު އަދި ޓްރާންސްފާ ކުރަން ޖެހޭ އެކައުންޓުގެ މައުލޫމާތު ވައިބާ މެދުވެރިކޮށް ހިއްސާކުރާނެ ކަމަށެވެ.

ޕޭމަންޓް ޓްރާންސްފާ ކުރުމަށްފަހު، ވައިބާ މެދުވެރިކޮށް ސްލިޕްކޮޅު ހިއްސާކޮށް ޕޭމަންޓް ކޮންފާމް ވުމުން ޑެލިވަރީ ޓީމުން ޑެލިވަރީ ކުރުމުގެ މަސައްކަތް ފަށާނެ ކަމަށް އެންޒީން ބުންޏެވެ.

ސާލާމަތާއި ރައްކާތެރިކަމަށް އަޅާ ފިޔަވަޅެއްގެ ގޮތުން މި މަހުގެ 19 ވަނަ ދުވަހުން ފެށިގެން ހަމައެކަނި އޮންލައިން ޕޭމަންޓް ބަލައިގަންނަ ގޮތަށް އެންޒީން ވަނީ ނިންމައިފައެވެ.

އެންޒީން ބުނީ ޑެލިވަރީ ކުރަމުން ދަނީ އެންޒީއަށް ޑެލިވަރީތައް ލިބިފައިވާ ތަރުތީބުން ކަމަށާއި އެހެން ނަމަވެސް ލިބިފައިވާ ޑެލިވަރީ ތަކުގެ އަދަދު ގިނަކަމުން ޑެލިވަރީ ލިބުމުގައި ލަސްވެފައިވާތީ ހުރިހާ ކަސްޓަމަރުންގެ ފަރާތުންވެސް މައާފަށް އެދޭ ކަމަށެވެ.