ކުޅުދުއްފުށީގައި ފިޔަވަޅުތައް އަޅާފައިވަނީ ސަރަހައްދުގެ ރައްޔިތުންގެ ސަލާމަތާއި ރައްކާތެރިކަމަށް: ލަތީފް

ކުޅުދުއްފުށި ފުރަބަންދުކޮށް އަރައި ފޭބުން މަނާކުރީ މުޅި ބޮޑުތިލަދުންމަތީގެ ރައްޔިތުންގެ ސަލާމަތާއި ރައްކާތެރިކަމަށްކަން ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން ވިދާޅުވެއްޖެ އެވެ.

ލަތީފް މިހެން ވިދާޅުވެފައިމިވަނީ ހުއްދަ ނުހޯދައި ކައިރި ރަށަކުން ހިދުމަތް ހޯދުމަށް އައި މީހަކަށް ކުޅުދުއްފުއްޓަށް ނޭރުމުން އެކަމުގެ ހިތްހަމަނުޖެހުން އެރަށުގެ ބަޔަކު ފާޅުކުރުމުންނެވެ. އަދި އެކަމުގެ ތެރެއަށް ވަނީ ހދ އަތޮޅު ކައުންސިލްގެ ނައިބު ރައީސް އަލީ މުހައްމަދު (ހިރިމަރަދޫ އަލީ) ވަދެފަ އެވެ.

ކުޅުދުއްފުއްޓަށްކީ އުތުރުގެ މައި ހަބަށްވުމުން ކޮންމެ ދުވަހަކުވެސް ގިނަ ބަޔަކު ސިއްހީ ހިދުމަތާއި ވިޔަފާރީގެ ކަންކަމުގައި އާދެ އެވެ. އަދި ދަތުރުފަތުރު ފަސޭހަކަމާއެކު އެރަށުން އަނެއް ރަށަށް ދިޔުމަށްވެސް ކުޅުދުއްފުށި މަގު ބޭނުންކުރެ އެވެ. އެކަމަކު މާލޭގައި ކޮވިޑް-19 ފެތުރެން ފެށި ހިސާބުން ކައުންސިލަށް އަދި ޓާސްކް ފޯސްއަށް އެންމެ މުހިންމުވީ ރަށް ބަންދުކުރުމަށެވެ. އެއީ ކުޅުދުއްފުށީގައި ފެތުރުމުގެ ފުރުސަތު ބޮޑުވުމުންނާއި ފެތުރިއްޖެނަމަ މުޅި ސަރަހައްދުގެ ރަށްތަކަށް ބަލި ފެތުރިގަންނާނެތީ އެވެ.

އެކަމަކު ސަރަހައްދުގެ ރައްޔިތުންނަށް ކާބޯތަކެއްޗާއި ސިއްހީ އަދި ވިޔަފާރީގެ ކަންކަން ހަމަޖެއްސުމަށް ބަނދަރުގައި ސެކިއުރިޓީ ޑެސްކް ގާއިމުކޮށް 24 ގަޑިއިރު އަންނަނީ ހިދުމަތް ދެމުންނެވެ. މިއީ މާލެ ފިޔަވާ 24 ގަޑިއިރު ހިދުމަތްދޭ ހަމައެކަނި ޓާސްކް ފޯސް އެވެ.

ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން މިއަދު ވިދާޅުވީ، މުޅި ރާއްޖޭގައި ސިއްހީ ކުއްލި ނުރައްކަލުގެ ހާލަތު އެޗްޕީއޭއިން އިއުލާނުކޮށްފައިމިވާ ދަނޑިވަޅުގައި ކުޅުދުއްފުއްޓަށް އައުމުގައި ދިމާވާ ދަތިތަކަށް ކެތްތެރިވުމަށް އަވައްޓެހި ރަށްތަކުގެ ރައްޔިތުންގެ ކިބައިން ލަތީފް ވަނީ އެދިލައްވާފައި އެވެ.

"ތިޔަބޭފުޅުން ކުޅުދުއްފުއްޓަށް އައުމަށް އެއްވެސް މީހަކު ދެކޮޅެއް ނުވާނެ. އެކަމަށް ހުރަސް އަޅަނީ ހާލަތެވެ. މިއީ އަޅުގަނޑުމެން މިސްކިތުގައި ޖަމާއަތް ނުހެދޭ ވަގުތެކެވެ. މިއީ މަހުޖަނުން ބޮޑު ހަރަދުކޮށްގެން ހެދި ރިސޯޓްރައްވެސް ބަންދުކޮށްފައިވާ ވަގުތެވެ. ދުނިޔޭގެ ބާރު ބޮޑު އެއާޕޯޓްތައް ވަނީ ހިމޭންވެފައި އެވެ. ގުގުމަމުން ދިޔަ ސްޓޭޑިއަމްތައް ވަނީ ފަޅުވެފައި އެވެ. ބަލަމުންދިޔަ ލައިވް މެޗެއް ނުފެނެ އެވެ. ބޮޑު ހަރަދުކޮށްގެން ދިޔަ މުގައްދަސް ބިމަކަށް ނުދެވެ އެވެ." ކުޅުދުއްފުށީ ކައުންސިލްގެ ރައީސް ވިދާޅުވި އެވެ.

އެހެންވީމާ ކުޅުދުއްފުއްޓަށް އައުމުގައިވެސް ދިމާވެގެން މިއުޅޭ ދަތިތައް ގަބޫލުކުރެއްވުމަށް ލަތީފް އެދިލެއްވި އެވެ.

މާލެ އާއި ކުޅުދުއްފުއްޓާ ދެމެދު ކޮންމެ ދުވަހަކު ކުރާ ދަތުރުފަތުރުތަކަށް ރިޔާއަތްކޮށް ލަތީފް ވިދާޅުވީ، މާލޭގައި ފެތުރިފައި އޮތްކަމެއް އެންމެ ފަސޭހައިން އައުމުގެ ފުރުސަތު އޮތީ ކުޅުދުއްފުއްޓަކަމަށެވެ. އަދި ވައިރަސް ކުޅުދުއްފުއްޓަށް އަތުވެއްޖެނަމަ ކައިރި ރަށްތަކަށް ބަލި ފެތުރުމުގެ ފުރުސަތު ބޮޑުކަން ފާހަގަކުރި އެވެ.

އޭނާ ވިދާޅުވީ، ބޭނުމަކީ އުނދަގޫކުރުން ނޫން ކަމަށާއި އެންމެންވެސް ރައްކާތެރިކުރުން ކަމަށެވެ. އުންމީދަކީ ކައިރި މުސްތަގުބަލެއްގައި ބަލި ފެތުރުން ކޮންޓްރޯލްވެ ހުރިހާ އެންމެންނަށްވެސް އެރަށުން އަނެއް ރަށަށް ދަތުރުކުރުމަށް މަގު ފަހިވެގެން ދިޔުންކަމަށެވެ. އަދި އުފަލާއެކު ހުރިހާ ފަރާތްތަކަށްވެސް މެހެމާންދާރީން ދޭން ބޭނުންވާ ކަމަށެވެ.

ކުޅުދުއްފުށީގައި ހަދައި އާ ބަނދަރު ހެދިގެން ދިޔުމުން މިހާރަށްވުރެއް ފަސޭހައިން ލަފާފުރުމުގެ ކަންތައްތައް ހަމަޖެހިގެންދާނެ ކަމަށެވެ. އަދި ސަރަހައްދީ ހޮސްޕިޓަލްގެ މެނޭޖްމެންޓްވެސް އޮތީ ރައްޔިތުންނަށް ސިއްހީ ފަރުވާ ދިނުމުގައި ކަމަށާ މިވަގުތު ފިޔަވަޅުތަކާ މެދު ކެތްތެރިވުމަށް ލަތީފް އިލްމާސްކުރެއްވި އެވެ.