ފިޔަވަޅުތައް އެޅީ އެންމެންގެ ރައްކާތެރިކަމަށްޓަކާ: ރައީސް

ކޮވިޑް-19 އާ ގުޅިގެން އެޅި ފިޔަވަޅުތަކުގެ ސަބަބުން ހިތްހަމަނުޖެހޭ ބަޔަކު ތިބެދާނެ ކަމަށާ އެކަމަކު އެ ފިޔަވަޅުތައް އެޅީ އެންމެންގެ ރައްކާތެރިކަމަށްޓަކާކަމަށް ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހް ވިދާޅުވެއްޖެ އެވެ.

ގައުމާ މުހާތަބު ކުރައްވާ ވާހަކަފުޅު ދައްކަވަމުން ރައީސް އިބްރާހިމް މުހަންމަދު ސޯލިހު ވިދާޅުވީ އެ ފިޔަވަޅުތައް ދުރާލައި ރާއްޖެއިންވެސް ނޭޅުނަމަ ދުނިޔޭގެ އެހެން ގައުމުތަކުގައި އުފުލަމުންދާ އުނދަގޫތައް އުފުލަން ޖެހުނީސް ކަމަށެވެ.

"ރާއްޖޭގައި ކޮވިޑް-19 ފެތުރެން ފެށިތާ އެންމެ ދޮޅު މަސްވެސް ނުވަނީސް، މިކަމުން އަރައިގަތުމުގެ ވާހަކަ. މާތް اللهގެ ވާގިފުޅާއެކު މި ދެކެވެނީ، ދުރާލައި މިފިޔަވަޅުތައް އެޅުމުގެ ސަބަބުން. އެހެން ނޫން ނަމަ، އަޅުގަނޑުމެން ވެސް މިއަދު ތަޖުރިބާކުރަމުން ދާނީ. ސިއްހީ ތަޖުރިބާކާރުން އަންދާޒާކުރެއްވި އެންމެ ނުރައްކާތެރި ހާލަތު." ރައީސް ވިދާޅުވި އެވެ.

ރައީސް ވިދާޅުވީ ބަލިން ރައްކާތެރިވުމަށް މަސައްކަތްކުރާ އިރު މި ބައްޔަށް ފަހުގައި އާންމު ދިރިއުޅުމަށް އެނބުރި ދިއުމަށް ތައްޔާރުވާންޖެހޭނެ ކަމަށާއި މިހާރު ކުރިމަތިވެފައިވާ އިޤްތިސޯދީ އަދި އިޖްތިމާއީ ދަތިތަކުން އަރައިގަތުމަށް އުފެއްދި ޤައުމީ ޓާސްކް ފޯހުން އެ މަސައްކަތް މިހާރު ކުރަމުންދާކަމަށް އެ މަނިކުފާނު ވިދާޅުވި އެވެ.

އެމަނިކުފާނު ވިދާޅުވީ، މިއީ ތިމާވެއްޓާ ރަހުމަތްތެރި ގޮތަކަށް ދިރިއުޅުން ބައްޓަންކުރަންވީ ވަގުތު ކަމަށެވެ. އަދި ބިދޭސީ މަސައްކަތްތެރިންގެ ދިރިއުޅުމުގެ ހާލަތު ރަނގަޅު ކުރުމަށް އިސްނަގަން ވަރަށް އެކަށޭނަ ވަގުތެއްކަމަށްވެސް ރައީސް ފާހަގަކުރެއްވި އެވެ. ރައީސް ވިދާޅުވީ މިއީ އާންމު ސިއްހަތަށް ފަރުވާތެރިވެ، މުޅި އިގްތިސޯދު އާރާސްތުކުރުމަށާއި ފަހަށް ރައްކާކުރުމުގެ އާދައަށް އަހުލުވެރިވުމަށް ލިބޭ ވަރަށް މުހިންމު ވަގުތެއް ކަމަށެވެ.

މިއީ މުޅި ދުނިޔެ ހުއްޓުމަކަށް އައިސްފައިވާ ވަގުތެއް ކަމަށާއި އެހެންކަމުން އިގްތިސޯދު އަލުން ފަށާއިރު އާ ވިސްނުން ގެންގުޅުމަކީ މުހިންމުކަމެއް ކަމަށެވެ.