ހެޕީމާކެޓުން ބޮޑުތިލަދުންމަތީގެ ހުރިހާ ރަށަކަށް ފޭސް ޝީލްޑް ހަދިޔާކޮށްފި

ހެޕީމާކެޓް ގުރޫފުން ބޮޑުތިލަދުންމަތީގެ ހުރިހާ ރަށަކަށް ފޭސް ޝީލްޑް ހަދިޔާކޮށްފި އެވެ. މި ފޭސް ޝީލްޑްތައް ރަށްތަކަށް ހަދިޔާކުރުމަށް ހަވާލުކޮށްފައިވަނީ ކުޅުދުއްފުށީ ރީޖަނަލް ހޮސްޕިޓަލާ އެވެ.

ހެޕީމާކެޓުން ހަދިޔާކޮށްފައިވަނީ 500 ފޭސް ޝީލްޑެވެ. މިތަކެތި ރަށްތަކަށް ބަހާލާފައިވަނީ އާބާދީގެ ނިސްބަތަށް ބަލައިގެންކަމަށް ރީޖަނަލް ހޮސްޕިޓަލުން މައުލޫމާތުދެ އެވެ.

ހއ، ހދ އަދި ށ އަތޮޅުގެ 41 ރަށުގެ ސިއްހީ މަރުކަޒުތަކާއި ހޮސްޕިޓަލުތަކުގައި ބޭނުންކުރުމަށް ހަވާލުކުރި މިތަކެތި ރަށްރަށުގެ ސިއްހީ މަރުކަޒުތަކަށް ފޮނުވުމުގެ މަސައްކަތް އެ ހޮސްޕިޓަލުން މިހާރު ވަނީ ފަށާފައި އެވެ. މިތަކެތި ހަދިޔާކުރުމުން ކޭއާރުއެޗުން ވަނީ ހެޕީމާކެޓަށް ވަނީ ޝުކުރުއަދާކޮށްފައި އެވެ.

ކޮވިޑާ ގުޅިގެން ސިއްހީ ފަރާތްތަކުން ބޭނުންކުރާ މިފަދަ ތަކެތި ލިބުމުގެ ދަތިކަން މުޅި ދުނިޔޭގައި ވަނީ ކުރިމަތިވެފައިވެ އެވެ. މީގެ ކުރިންވެސް ހެޕީމާކެޓުން ވަނީ ކޮވިޑާ ގުޅިގެން ރަށްތަކަށް އެހީތެރިކަން ފޯރުކޮށްދީފައި އެވެ.

އެގޮތުން ކުޅުދުއްފުއްޓާއި ހަނިމާދޫގެ ޓާސްކް ފޯސްއަށް ހެޕީމާކެޓުން ވަނީ ސެނިޓައިޒާ ހަދިޔާކޮށްފައި އެވެ. މީގެ އިތުރުން ކުޅުދުއްފުށި ޓާސްކް ފޯސްއަށް ވަނީ 100 ކޭސް ފެންވެސް ހަދިޔާކޮށްދީފައި އެވެ.