މި ހަފުތާގައި ކުރިއަށް އޮތް ދެ ދުވަހު ވެސް އޮފީސްތައް ހުޅުވާނީ ކޮވިޑް-19 އާ ގުޅިގެން ފަހަކަށް އައިސް ހަމަޖައްސާފައިވާ އުސޫލުން ކަމަށް ރައީސް ކަނޑައަޅުއްވައިފި އެވެ.
މާދަމާއިން ފެށިގެން އޮފީސްތައް ހުޅުވާނެކަން އިއުލާން ކުރުމަށްފަހު މާދަމާ އާއި ބުރާސްފަތި ދުވަހު ވެސް އޮފީސްތައް ހުޅުވާނީ ކޮވިޑް-19 އާ ގުޅިގެން ކޮންމެހެން ކުރަންޖެހޭ މަސައްކަތްތަކަށް އޮފީސްތައް ހުޅުވާ އުސޫލުންކަމަށް ހާމަކޮށްފައިވަނީ ރައީސް އޮފީހުން ނެރުނު ބަޔާނެއްގަ އެވެ.
ރައީސް، މިއަދު ހެނދުނު ކުރެއްވި ޓުވީޓެއްގައި ވިދާޅުވީ، ކޮވިޑް-19 ފެތުރޭތީ ސަރުކާރުގެ އޮފީސްތައް ބަންދުކޮށްފައި އޮތުމަށް ފަހު، ރައްކާތެރިވެ ތިބުުމުގެ ފިޔަވަޅުތަކާ އެކު އޮފީސްތައް މާދަމާ ހުޅުވާނެ ކަމަށާއި ކޮވިޑް-19ގެ މަސައްކަތްތައް ކުރަން އުފެއްދި ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ގެ މަސައްކަތްތައް މާދަމާ ނިމުމަކަށް އަންނަ އާ މަރުހަލާގައި އޮފީސްތަކާއި ކެފޭ/ރެސްޓޯރެންޓުތައް ހުޅުވާނެ ކަމަށް ވެސް ރައީސް ވިދާޅުވި އެވެ.
އެހެންކަމުން ބުދަ، އަދި ބުރާސްފަތި ދުވަހު އޮފީސްތައް ހުޅުވާނީ މިދިޔަ މަހެއްހާ ދުވަހު ވެސް ކޮންމެހެން ކުރަންޖެހޭ މަސައްކަތްތަކަށް އޮފީސްތައް ހުޅުވި ގަޑިއަށެވެ. އެއީ ހެނދުނު 9 ން މެންދުރުފަހު 1 އަށެވެ.
ރައީސް ކަނޑައަޅުއްވާފައިވާ ގޮތުން، މި ދެ ދުވަހު ވެސް އޮފީސްތައް ހުޅުވައިގެން ޚިދުމަތްތައް ދޭން ވާނީ އެޗުޕީއޭ އިން ކަނޑައަޅާ މިންގަނޑުތަކާއި އުސޫލުތަކާ އެއްގޮތަށެވެ.
