ޓީޓީއެމް ފެއާ ނޮވެމްބަރުމަހު ބާއްވަނީ

ޓްރެވަލް ޓްރޭޑް މޯލްޑިވްސް (ޓީޓީއެމް) ފެއާ މި އަހަރުގެ ނޮވެމްބަރު މަހު ބާއްވަން ނިންމައިފި އެވެ.

މިހާރު ރެޖިސްޓްރޭޝަނަށް ހުޅުވާލާފައި ވާއިރު މި އަހަރުގެ ޓީޓީއެމް ފެއާ އޮންނާނީ ނޮވެމްބަރު މަހުގެ 24 އިން 26 ގެ ނިޔަލަށެވެ. ނަމަވެސް ފެއާ ބާއްވާނެ ތަނެއް އަދި އިއުލާނެއް ނުކުރެ އެވެ.

އެގޮތުން މި ފެއާގައި ރަޖިސްޓްރީ ވާން ބޭނުންވާ ފަރާތް ތަކުން ޓީޓީއެމް ފެއާގެ "ކަނެކްޓް" ޕްލެޓް ފޯމުން ރަޖިސްޓްރީ ވެވޭނެ އެވެ.

ރާއްޖޭގައި ބާއްވާ ހަމައެކަނި ޓޫރިޒަމް ފެއާ ކަމަށްވާ ޓީޓީއެމް އިންތިޒާމު ކުރާ ކުންފުނިން ބުނި ގޮތުގައި މި އަހަރުގެ ފެއާގައި ވެސް 150 ރިސޯޓާއި ހޮޓެލްސްގެ އިތުރުން 30 ގައުމަކުން 200 ޓްރެވަލް އެޖެންޓުން ބައިވެރިވާނެ އެވެ.

ކޮވިޑް-19 އާ ގުޅިގެން ދުނިޔޭގެ ޓޫރިޒަމް ހުއްޓިފައި އޮތުމުން ދުނިޔޭގެ އެކި ގައުމުތަކުގައި ބާއްވަމުން ދިޔަ ޓޫރިޒަމް ފެއާތައް ވެސް މި ވަގުތަށް ވަނީ ހުއްޓިފަ އެވެ. ނަމަވެސް ކޮވިޑް ކޮންޓްރޯލް ވާން ފެށުމާއެކު ގިނަ ފެއާތައް ބާއްވަން މިހާރު ދަނީ ތާރީހުތައް އިއުލާނު ކުރަމުންނެވެ.

ދުނިޔޭގައި ބާއްވާ އެންމެ ބޮޑު ދެ ފެއާ ކަމަށްވާ އައިޓީބީ އާއި ޑަބްލިއުޓީއެމް، ލަންޑަން ފެއާ ވެސް މި އަހަރު ވަނީ ކެންސަލް ކޮށްފަ އެވެ.