އީރާނުން ފޮރުވައިގެން އުޅުނު ކޮވިޑްގެ އަދަދު ފަޅާއެރީ ޑޭޓާ ލީކަކުން

އީރާނުގެ ސަރުކާރުން އެގައުމުގައ ކޮވިޑް-19 ޖެހިގެން މަރުވާ މީހުންގެ މައުލޫމާތު ހިއްސާކުރަމުން އައީ އޮޅުވާލައިގެން ދޮގުކޮށްކަން ޑޭޓާ ލީކަކުން ފަޅާ އަރައިފި އެވެ.

އެގައުމުގެ ހެލްތް މިނިސްޓްރީން ދީފައިވާ ފަހުގެ މައުލޫމާތަށް ބަލާއިރު މިހާތަނަށް ކޮވިޑް-19 ގައި އެގައުމުން މަރުވެފައިވަނީ 14،405 މީހުންނެވެ. ނަމަވެސް ލީކު ވެފައިވާ ނަތީޖާއިން އެނގޭ ގޮތުގައި ސަަރުކާރުން ބުނާ އަދަދަށް ވުރެ މީހުން މަރުވެފައިވާ އަދަދު 3 ގުނަ އިތުރުކަަމަށް ބީބީސީން ވަނީ ރިޕޯޓުކޮށްފައެވެ. އެގޮތުން މިހާތަނަށް 42،000 މީހުން ވަނީ މަރުވެފައެވެ.

އަދި ބަލި ޖެހުނު މީހުންގެ އަދަދުވެސް ދެގުނަ އިތުރުކަމަށްވެސް ބީބީސީގެ ރިޕޯޓުގައި ވެއެވެ. އެގައުމުން މިހާތަނަށް ބަލި ޖެހުނު މީހުންގެ އަދަދުކަމަށް ބުނެފައިވަނީ 278،827 އެވެ. ނަމަވެސް އަސްލު އަދަދަކީ 451،024 ކަމަށް ރިޕޯޓުގައި ވެއެވެ.

އެގައުމުގައި ފުރަތަމަ ކޮވިޑް ޖެހިގެން މީހަކު މަރުވެފައިވަނީ 22 ޖެނުއަރީގައެވެ. އަދި މިއީ ފުރަތަމަ ކޮރޯނާ ވައިރަހުގެ ކޭސްއެއް ފެނުނުތާ ގާތްގަނޑަކަށް މަހެއްހާ ދުވަސް ފަހެވެ. އަދި އެގަމުގައި ވައިރަސް ފެތުރެން ފެށިތާ ގާތްގަނޑަކަށް މަސް ދުވަހުގެ ތެރޭގައި 52 މީހަކު ވަނީ މަރުވެފައެވެ.