ސާފް ޗެމްޕިއަންޝިޕް: ޕާކިސްތާނުން ތާރީހީ ދިގު އިންތިޒާރަކަށްފަހު ފަސް މަސް ތެރޭ ދެވަނަ ފަހަރަށް ރާއްޖެ ބަލިކޮށްފި

ޓެކްނޯ ސާފް ޗެމްޕިއަންޝިޕް 2026 ގައި މިއަދު ހަވީރު ޕާކިސްތާނާ ބައްދަލުކޮށް 3-0 ގެ ނަތީޖާއަކުން ދިވެހި ޓީމު ބަލިވެއްޖެ އެވެ. ޑާކާ ނެޝަނަލް ސްޓޭޑިއަމްގައި ކުޅުނު މި މެޗުން ހޯދި މޮޅާއެކު ޕާކިސްތާނުން ވަނީ މި މުބާރާތުގެ ސެމީ ފައިނަލްގެ ޖާގައެއް ކަށަވަރުކޮށްފަ އެވެ.

މިއީ ފުޓުބޯޅައިގެ ތާރީހުގައި ދިވެހި ޓީމާ ދެކޮޅަށް ޕާކިސްތާނުން ހޯދި ވަރަށް މުހިންމު ކާމިޔާބެކެވެ. މީގެ 35 ވަރަކަށް އަހަރަށްވުރެ ގިނަ ދުވަހު ރާއްޖެ އަތުން މޮޅެއް ނުހޯދި ދިގު އިންތިޒާރެއް ކުރަން ޖެހުނު ޕާކިސްތާނުން، މިދިޔަ ޖޫން މަހު މާލޭގައި ބޭއްވި ޑައިމަންޑް ޖޫބިލީ އިންޓަނޭޝަނަލް މުބާރާތުގައި ވެސް ވަނީ 3-0 އިން ރާއްޖެ ބަލިކޮށްފަ އެވެ. (އެއީ 1991 ވަނަ އަހަރުގެ ސާފް ގޭމްސްގެ ފަހުން އެ ޓީމަށް ރާއްޖެ އަތުން ލިބުނު ފުރަތަމަ މޮޅެވެ). އަދި މިއީ ސާފް ޗެމްޕިއަންޝިޕެއްގެ ތާރީހުގައި ވެސް ޕާކިސްތާނުން ރާއްޖެ ބަލިކުރި ފުރަތަމަ ފަހަރެވެ.

މިއަދުގެ މެޗުގެ ފުރަތަމަ ހާފުގައި ޕާކިސްތާނުން ވަނީ މޮޅު ކުޅުމެއް ދައްކާ ފަސޭހަކަމާއެކު ތިން ލަނޑުގެ ލީޑެއް ނަގާފަ އެވެ. މެޗުގެ ކުރީކޮޅު ލިބުނު ޕެނަލްޓީއަކުން އެ ޓީމަށް ލީޑުނަގައިދިނީ މެކްކީލް އާރޫން އަބްދުﷲ އެވެ. އޭގެފަހުން މެޗުގެ 8 ވަނަ މިނިޓާއި 23 ވަނަ މިނިޓްގައި ނަޖީބުﷲ ކާމިޔާބުކޮށްދިން ދެ ލަނޑާއެކު ޕާކިސްތާނުން މެޗުގެ ކޮންޓްރޯލް ހޯދި އެވެ.

ފުރަތަމަ ހާފުގައި ލިބުނު ފުރުސަތުތަކުގެ ބޭނުން ނުހިފުނު ނަމަވެސް، ދިވެހި ޓީމުން ވަނީ ދެވަނަ ހާފުގައި ކުޅުން ރަނގަޅުކޮށްފަ އެވެ. އެގޮތުން ޓީމުގެ އެޓޭކް ވަރުގަދަ ކުރުމަށް ކޯޗު ގެނައި ބަދަލުތަކާއެކު މެޗުގެ 65 ވަނަ މިނިޓްގައި އަލީ ފާސިރު (ސެންޓޭ) ތަނަވަސްކޮށްދިން ފުރުސަތެއްގައި މުހައްމަދު ނާއިމް ފޮނުވާލި ހަމަލާ ޕާކިސްތާން ކީޕަރު ވަނީ ހުށިޔާރުކަމާއެކު މަތަކޮށްފަ އެވެ. އަދި މެޗުގެ އެންމެ ފަހު ވަގުތުކޮޅުގެ ތެރޭގައި ނައްސާހު އިބްރާހިމް ނާސިރު ފޮނުވާލި ނުރައްކާތެރި ޝޮޓެއް ދިޔައީ ހުރަސްދަނޑިމަތިން ބޭރަށެވެ.

މި ނަތީޖާއާ ގުޅިގެން ގްރޫޕް ބީގެ ފަހު މެޗު ވެގެންދާނީ ރާއްޖެއަށް ވަރަށް ބޮޑު އަދި ވާދަވެރި މެޗަކަށެވެ. ސެމީ ފައިނަލުގެ ފުރުސަތު ބާކީ އޮތްއިރު، އަންނަ ބުދަ ދުވަހު އިންޑީއާއާ ދެކޮޅަށް ކުޅޭ މެޗު ތިން ގޯލުގެ ފަރަގަކުން ކާމިޔާބުކޮށްގެން ނޫނީ ރާއްޖެއަށް ކުރިއަށް ދިއުމުގެ ފުރުސަތެއް ނެތެވެ. މި ގްރޫޕުގައި ހިމެނޭ އިންޑިއާއަށް އެއްވަރުކޮށްލައިގެންވެސް ސެމީގެ ޖާގައެއް ލިބޭނެ އެވެ.